Czejbë nié interwencjô młodszégò aspiranta Klejnë, drogeriô stracëłabë towôr ò wôrtnocë kòl dzewiãcset złotëch.
W piątk sódmégò strëmiannika młodszi aspirant Adrión Klejna z lãbòrsczi pòlicje pò skùńczony służbie béł za kùpiszama w jedny z lãbòrsczich drogeriów. Dozdrzôł chłopa, chtëren zdjimôł kartonë z parfùmama z górny pòlëcë w krómie i chòwôł cos w czeszéń. Szandara przëzérôł sã chłopù, jaż ten minął kasë nie płacącë za towôr. Zatrzimôł gò, przedstawił służbòwą legitimacjã i kôzôł wëjic wszëtkò z czeszeniów. Tak pòdezdrzóny wëjął z nich sztërë bùdeleczczi parfùmów i dwie pôrë stréflów ò prizu wnetka dzewiãcset złotëch. Pò tim kradélc próbòwôł zwiornąc i wëriwôł sã szandarze, le młodszi aspirant Klejna przëtrzimôł agresywnégò przesprôwcã z pòmòcą jinszégò klijenta. Wezwóny òstôł patról pòlicje, jaczi zajął sã sprôwcą. Béł to dwadzescesétmëlatny Lãbòrżón, chtëren dostónie òbwinë kradélstwa i atakù na szandarã. Mòże jic za to do sôdzë na piãc lat.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie