Szandarów nicht nie słëchôł

Òdjimczi zamiarzłi Mòtławë zalałë media, nié blós spòlëznowé. Przelezc sã pò ni to rzôdkô leżnosc òbezdrzeniô Gduńska z jinszi perspektiwë, ale téż smiertny niebezpiek.

Przez mróz pòd kùńc stëcznika we Gduńskù zamiarzła Mòtława. Pierszi na lód wchôdelë wãdkarze, a zachãcony tim mieszkańcë i turiscë w wikszi grëpie weszlë na rzékã w niedzelã pierszégò gromicznika. Szpacérowelë całima rodzëznama, téż z dzecnyma wòzykama, a niechtërny jezdzelë téż na kòłach. Tam, gdze lëdzy chòdzëło mni, w przerãblach wcyg łowilë wãdkarze. Grëbòsc lodu na wiéchrzëznie rzéczi wichlała sã òd dzesãc do dwadzesce piãc centimétrów. W teòrie to je dosc, żebë ùtrzëmac dozdrzeniałégò człowieka. W praktice lód mòże bëc łómniészi w placach, gdze wòda chùdzy przepłiwô, a òsoba, co nie je zwëczajnô chòdzëc pò lodze, mòże taczégò placu na zdrok nie zmerkac. Pòlicjô i mieskô starżô pòstawiłë swòje aùtołë wëżi Mòtławë i dozérałë lëdzy na lodze. Ti nie reagowelë, czej szandarzë òstrzégelë przez megafònë ò mòżebnym niebezpiekù i prosëlë, żebë wrócëc na ląd. Jak pòdsztrëchiwô pòlicjô, chòdzenié pò zamiarzłi Mòtławie ni mòże bëc ùznóné za przesprawã, tej zatrzimania ani sztrôfë za to nie grożą. Doszło równak i w niedzelã i w ùszłëch dniach do czile interwencjów, czej niechtërny na lodze zachòwiwelë sã òsoblëwie niebezpieczno.

Na spòdlim:
https://www.gdansk.pl/wiadomosci/Gdansk-spacery-po-zamarznietej-Motlawie-Czy-to-bezpieczne,a,304198
https://nadmorski24.pl/aktualnosci/78067-takiego-widoku-gdansk-nie-widzial-od-lat-motlawa-skuta-lodem
https://dziennikbaltycki.pl/nowy-lodowy-niebezpieczny-deptak-w-gdansku-policja-to-moze-zakonczyc-sie-tragedia/ar/c1p2-28688471
https://www.facebook.com/story.php?story_fbid=1209326747966422&id=100066673249154