Reklama

Szandarzë zatrzimelë patriarchã Jeruzalemù

Klëka

31/03/2026 11:53

Pòlicjô ùnimòżebniła głowie Katolëcczégò Kòscoła w Swiãti Zemi ùdzél w mszë w Kwietną Niedzelã. Prezydent Izraela gôdô, że to dlô jegò bezpiekù.

W slédnëch dniach łacyńsczi patriarcha Jeruzalemù kardinał Pierbattista Pizzaballa dôł do wiadë, że z pòzdrzatkù na wòjnã Izraela z Iranã i òstrzeliwanié Jeruzalemù nié wszëtczé òbchòdë Wiôldżégò Tidzenia bãdą mòglë latos bëc normalno przeprowadzoné. Pòwiedzôł ju ò òdwòłanim tradicjowi procesje z Òlëwny Górë do Bazyliczi Swiãtégò Grobù w Kwietną Niedzelã, a co do nédżi ùroczëznów jich przeprowadzenié mô bëc zanôleżné òd przepisów bezpiekù. Wstãpno w òbéńdze Stôrégò Gardu zakôzóné mają bëc zgromadzenia wszëtczich wëznaniowëch związków, gdze brałobë ùdzél wicy jak piãcdzesąt òsób. W Kwietną Niedzelã równak kardinał Pizzaballa i frãcëszkańsczi Kùstosz Swiãti Zemi Francesco Ielpò szlë do Bazyliczi Swiãtégò Grobù na skrómną, priwatną mszã. Chòc nie bëło z nima niżódny procesje, szandarzë nie wpùscëlë jich bënë i kôzelë zawrócëc. Bióro patriarchë wëdało òswiôdczenié w ti sprawie. Kardinał Pizzaballa ni mô ùdbóné łamac nałożonëch ògrańczeniów, ale dzejanié szandarów w niedzelã bëło wedle niegò pòspiéwné ë nieùdokaznioné. Niezgòdã na taczé dzejania wërażëlë premiérka Italsczi Giorgia Meloni ë italsczi minister bùtnowëch sprôw Antonio Tajani. Prezydent Izraela Izaak Herzog òswiôdcził, że zwònił do patriarchë i wërazył ból przez niedzelny incydent, pòdczorchiwającë, że célã bëło leno zagwësnienié kardinałowi bezpiekù. Premiéra Benjamin Netanjahu dôł do wiadë, że wëdôł służbóm pòlétë, żebë ju òdtąd nie strzëmiwac patriarchë przed wchôdanim do Bazyliczi Swiãtégò Grobù, le dac mù dzejac wedle gwôsny dbë.

H.S.Sz.

Źródło i opracowanie własne