Reklama

Szarża pòd Krojantama latos równak mòżlëwô?

Klëka

28/01/2026 14:24

Z Kaszëb, Szarża Krojantama latos równak mòżlëwô - zdjęcie, fotografia

Gmina Chònice ni mô dëtków, ale bãdą jich szëkac lubòtnicë kawalerie. Wszëtkò, żebë jak rok w rok mòc przëraczëc lëdzy w séwnikù do Krojantów.

Chòc wëszëznë gminë Chònice zapòwiedzałë, że w séwnikù widzawiszcza szarżë pòd Krojantama nie bãdze przez felënk dëtków, Pòlsczi Kawalerijsczi Klub przekònywô, że równak je nôdzeja. Stowôra z sedzbą w Pòznaniu wëdała òdemkłi lëst do lubòtników historie kawalerie. Dzejarze bãdą próbòwelë zebrac dëtczi na widzawiszcze. Gôdają, że dérëjącô òd dwadzesce piãc lat tradicjô je czims rzôdczim i wiele wôrtnym w skalë pòlsczi, dlôte wôrt jã ùtrzëmac. Zachãcëlë do robieniô wpłatów przez òdpis półtora procenta pòdatkù na stowôrã a téż na ji kònto jakno òrganizacje pùblicznégò pòżëtkù, co fizyczné òsobë i prawné subiektë bãdą mògłë sobie wpisac do swòjégò dzejaniô i tak zmniszëc so dochód, a przez to i pòdatk do òdrechòwaniô za rok. Rëgnãła téż zbiórka na pòrtalu zrzutka.pl. Wszëtczé dëtczi, jaczé trafią do stowôrë przez te trzë métle, mają bëc wëdóné na transpòrt kòni, historiczné mùndurë i wòzë. Pòlsczi Kawalerijsczi Klub òswiôdcził téż, że jegò dzejarze bãdą trzëmac starã ùdostac ùdëtkòwienié òd rozmajitëch subiektów. Wiedno òrganizacjô wëdarzeniô zabiérała kòl sztërësta tësący złotëch. Jeżlë szlachòwną sëmã ùdô sã zebrac do séwnika, nôgwësni roczëzna szarżë pòd Krojantama bãdze przëwdarzonô widzawiszczã.

H.S.Sz.

Źródło i opracowanie własne