Radny gminë òbezdrzelë bùdink. Stón inwesticje za dzesãc miliónów nie je nôlepszi.
Òddóny do ùżiwkù latos w gromicznikù zmòdernizowóny Dodóm Kùlturë w Czerskù w chònicczim krézu we strzodã 2. rujana òstôł pòddóny przezérkòwi przez radnëch gminë Czersk mët z robòtnikama Gminnégò Centrum Kùlturë, w związkù z wątplëwòtama co do techniczny stojiznë bùdinkù, chtërne bëłë rzekłé na slédnym zéńdzenim radzëznë gminë Czersk. Techniczny czerownik GCK scwiérdzył kòl 40 rozpãkłosców scanów a téż fùchtnosc w sklepach bùdinkù. Mają bëc téż jiwrë z wentilacją i ùwôdżi co do bezpiekù kònstrukcje.
Mòdernizacjô bùdinkù dërchała półtora rokù. Z zôczątkù béł ùmëslony blós remònt, ale samòrząd zdecydowôł ò wëbùrzenim stôrégò, drewnianégò partu bùdinkù i pòstawienim na jegò fùńdameńtach nowi mùrowóny kònstrukcje, co téż òstało skritikòwóné pò strzodowim przezérkù – jeden z radnëch gôdôł ò zagrôżbie dlô kònstrukcje bùdinkù przez dërgòtanié z wòjewódzczi drodżi. Krótkò pò òdemkniãcym bùdacjô bëła chwôlonô przez samòrząd za bëlné wëkònanié robòtë. Bëła téż zgłoszonô do nôdgrodë „Mòdernizacjô rokù & Bùdacjô XXI w.”. Robòta kòształa 10 mln złotëch i òsta dofinancowónô z „Pòlsczégò Ładu”.
HSz
Twoje zdanie jest ważne jednak nie może ranić innych osób lub grup.
Komentarze opinie