Mòst béł wpisóny na krajewą lëstã kùlturowi spôdkòwiznë. Rząd mô wesprzéc òdbùdowã.
Przez dérëjącą òd czile tidzeniów szlagã, ògłoszoną jakno nôwikszé òpadë òd sto trzëdzescë piãc lat, a téż sztorm Martinho, chtëren zabił ju nômni trzë òsobë, rzéczi w Szpańsce mòckò dobrałë. W niedzelã dwadzestégò trzecégò strëmiannika w nocë w prowincje Toledo, gdze w aùtonomiczny pòspólnoce Kastiliô-La Mancha ewakùòwelë kòl dwasta lëdzy, w môlëznie Talavera de la Reina we wiôldżim parce zawalił sã zabëtkòwi Stôri Mòst nad rzéką Tag, zwóny téż Mòstã Swiãti Katarzënë. Nôstarszé nadczidczi ò nim pòchôdają z jednôstégò stalatégò. Przeprawa bëła zbùdowónô w wikszim dzélu w strzédnëch stalatach, ale ùchòwóné w ni bëłë fragmentë starszégò mòstu jesz z rzimsczégò cządu. Nie wëtrzimała mòcë żochù – w sobòtã przepłiw wòdë w Tagù sygnął przez tësąc kùbikmétrów na sekùndã. Premiéra Szpańsczi Pedro Sanchez zapòwiedzôł, że mòst wpisóny na szpańską lëstã Dobrów Kùlturowégò Interesu òstónie òdbùdowóny. W sztóce ùpôdkù béł òn zamkłi dlô piechtnëch, a terô szandarzë pilëją, żebë nicht nie pòdchôdôł do jesz òstałëch jegò dzélëków.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie