Reklama

Szpiónka-nãtnica schwôconô w Kijiwie

Klëka

04/02/2026 17:59

Gazétniczka z Biôłorusczi grała z ùkrajińsczima wódcama i pitała sã ò żôłnérzi. Òd czile miesący dostôwała równak milné wiadë.

Pòd kùńc stëcznika ùkrajińsczé służbë bezpiekù zatrzimałë trzëdzescë piãc lat stôrą gazétniczkã Inã Kardasz. Ùkrajińskô telewizjô dała terô do wiadë, ò co je winowónô. Białka z Mińska òd dwa tësące piãtnôstégò rokù wespółrobiła z biôłorusczim Kòmitetã Państwòwégò Bezpiekù. W swòjim kraju robiła przë rozmajitëch mediach, w tim òpòzycjowëch, jaż w dwa tësące dwadzestim rokù przeniosła sã do Ùkrajinë. Zaczãła robic w telewizje 112 Ùkrajina pòrzeszony z prorusczima òligarchama Tarasã Kòzakã i Wiktora Medwedczukã, jaż w kùńcu przeniosła sã do państwòwi agencje Interfaks-Ùkrajina. Jakno gazétniczkã prowadzëła wëdowiédzë z nôwôżniészima òsobama w państwie, w tim z prezydentã Wòłodimirã Zełeńsczim. Ji célã równak bëlë dobrowòlcë biôtkający pò starnie Ùkrajinë, w tim fòrmacje złożoné z Biôłorusków i Rusków. Je wiedzec ò czile znãconëch przez niã wódców tëch fòrmacjów. Miéwała z nima intymné zéńdzenia i wëcygała wiadë ò dobrowòlcach, jaczé przekazéwała prowadzącémù òficérze na Biôłorusce. Dostôwała z Mińska dokładné wskôzë z kògùm sã pòtëkac i ò co sã pëtac. W dalszi perspektiwie miała nalezc robòtã w Przédnym Zarządze Wëdowiédzë Ministerstwa Òbarnë Ùkrajinë. Ò dzejaniach Kardasz ùkrajińskô wëdowiédzô mia swiądã ju dôwno. Przez czile slédnëch miesąców Służba Bezpiekù Ùkrajinë i Przédny Zarząd Wëdowiédzë pòzwôlałë ji na dzejanié, le ùgwësniłë sã przë tim, że dostôwała falszewé infòrmacje. Zatrzimelë jã w kùńcu w Kijiwie gdze zabrelë ji mòbilkã i diktafón. Za szpióństwò grozy ji do piãtnôsce lat sôdzë i zagôrënk miectwa.

Źródło i opracowanie własne