Reklama

Sztrąd we fritkach i cëbùlë

Klëka

20/01/2026 10:04

Òdj. Eduard47; zdrzódło: https://pl.wikipedia.org/wiki/Kontenerowiec#/media/Plik:2017-08-28_HS-Reise_Aussichten_(967).jpg

Wòlontariusze zabrelë sã za sprzątanié pieglëszczów w dwùch môlëznach we Wschódnym Sussexu. Szło ò retënk dlô lokalny rodë.

Midzë szóstim a dzesątim stëcznika òb czas sztorëmù Gòretti na Karnôlu La Manche do wòdë spadłë niechtërne kòntenerë z jôdą wladowóné na trzë òkrãtë. Wòda zahalała ladënk na Anielską, do Wschódnégò Sussexu. W sobòtã sétmënôstégò stëcznika sztrąd w Eastbourne béł pòkrëti fritkama, a w Brighton cëbùlą. Jôda ju sã nie nadôwô do jedzeniô, bò w wòdze zaczãła gnic, tej zaléganié jich na sztrądze grozy lëchima skùtkama dlô nôblëższégò strzodowiszcza. Tôczel béł téż we wielnëch plastikòwëch òpakòwaniach, chtërne razã z fritkama i cëbùlą zniosło do brzegù. Tu nôwikszô zagrôżba je dlô zélińtów, jaczé mògą zainteresowac sã miészkama i sã nima bawic abò próbòwac je zjesc. W wëcyganié plastikù spòmidzë ladënkù zaangażowała sã môlowô spòlëzna w Eastbourne, jakô rëgnãła na sztrąd i w czile gòdzyn zebrała całi plastik. W pòniedzôłk dzewiãtnôstégò stëcznika mieskô radzëzna pòcwierdzëła, że òstało ju leno sprzątnąc same fritczi. W Brighton z cëbùlą zmieszałë sã biksë, plastikòwé bacherczi ë rãkawiczczi. Tuwò mieszkańcë delë sã na sprzątniãcé wszëtczégò dorazu. Przez trzë dni wëcmanim zebrelë do czësta kòl dwie tonë òdpadów. Òkróm tegò służbë zabrałë ju ze sztrądów w jinëch môlëznach ùszkòdzoné kòntenerë, z jaczich równak ladënk sã w wikszoscë nie wësëpôł.

H.S.Sz.

Załączniki