Czersczi òddzél òstrzódka zajimô sã terapią przesprôwców, jaczi nimò òdsedzeniô zasądzony sztrôfë ni mògą wrócëc do żëcégò w spòlëznie.
W òddzélu Krajewégò Òstrzódka Zapòbieganiô Dissocjalnym Zachòwanióm w Czerskù, jaczi pòdlégô pòd przédną sedzbã ti institucje w Gòstininie w mazowiecczim wòjewództwie, zaczął sã sztrajk partu zamkłëch tam pacjentów, chtërny na mòcë apartny ùstawë bëlë przeniosłi do KÒZDZ ju pò òdbëcym sztrôfë za przesprawë, za jaczé òstelë sądowò skôzóny. Pacjencë òdmôwiają żëwieniô sã jedzenim, jaczé pòdôwô jima òstrzódk – miast tegò bãdą jedlë z kùpiszów zrobionëch przed zaczãcym strajkù, w tim słodczëzną. Na szlachòwny sztrajk delë sã téż òsòdzony z Gòstinina.
Sztrajkùjący domôgają sã prawny zjinaczi co do jich bezterminowégò zamkniãcô w KÒZDZ. Tpzw. Ùstôw ò bestiach z 2013 r. ùmòżebnił sczerowanié na nieòkreslony czas do òstrzódka w Gòstininie òsób, jaczé òdsedzałë ju nałożony na nie wërok, ale z pòzdrzatkù na psychiczné jiwrë i scwierdzenié że sprôwiają zagrôżbã dlô żëcô, zdrowiô i seksualny wòlnoscë, ni mògą bëc wëpùszczony i wrócëc do fùnsknérowaniô w spòlëznie. Òbjãti ùstawą bëlë m.jin. Mariusz Trinkewicz czë Leszk Pãkalsczi, znóny jakno Wampir z Bëtowa. Òd 2022 pacjencë KÒZDZ sedzą téż w nowim òddzélu institucje w Czerskù. Sztrajkùjący tam są pòddôwóny mediczny òpiece, a direkcjô zòrganizowała z nima mediacjowé pòtkanié.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie