Reklama

Sztërdzescë tësący ton sztofù gnije w Kamiéńcu

Klëka

10/11/2025 12:11

Z Kaszëb, Sztërdzescë tësący sztofù gnije Kamiéńcu - zdjęcie, fotografia

Tekstiliów sã nie rechùje do niebezpiecznëch òdpadów, le wójt Jerzi Bańka przestrzégô, że z kòpicë sztofù w jegò gminie to mòże dac pòszëdło, plagã szurów abò òdżin.

Wójt gminë Céwice Jerzi Bańka żdże za òdpòwiescą z Ministerstwa Strzodowiszcza na pismiono, jaczé złożił w rujanie. Prosył w nim ò interwencjã w sprawie nielegalnégò smiecëszcza w Kamiéńcu, gdze pòd gòłim niebã leżi kòl sztërdzescë tësący tón sztofù. Òd dwùch lat smiecë ju nie są tam dowòżoné, a lëdze, jaczi òdpòwiôdają za jegò pòwstanié, mają sztrôfny proces, le gmina dali nie je w sztãdze sfinancowac procesu rëmniãcô smiecy. Firma, jakô pòzwòlëła na jich zwiezenié, ni mòże sã wëpłacëc. Priz za cawną likwidacjã smiecëszcza wójt taksëje na kòl piãcdzesąt miliónów złotëch – taczi sëmë wëłożëc nie je w sztãdze nawetka wòjewódzczi ùrząd, a rządowé programë wspiérają leno likwidacje tëch smiecëszczów, gdze leżą niebezpieczné òdpadë. Sztof do taczich nie nôleżi, a z badérowaniów wòjewódzczich òrganów wëchôdô, że do skażeniô gruńtu nie doszło. Wójt wskazéwô na to, że przemòkłé materiałë zwëczajno gniją do taczégò stãpnia, że roscą ju na nich brzózczi. To z jedny starnë mòże sprawic, że bãdą tam przëlôżałë szërë, a z drëdżi zwiksziwô rizykò ògnia przez zbiéranié sã gazów. W slédnëch latach òdżin wëbùchiwôł na smiecëszczu kòl sztërdzescë razy. Dlô zabezpieczeniô lasów przed grozbą pòstãpnëch taczich przëtrôfków wójt w ùgôdënkù z nadlesyństwã przeprowadzył wëcãcé pasa drzéw nôkrodzy stolëmny kòpicë sztofù.

H.S.Sz