Reklama

Sztrid ò kartësczi Szpanerplac

Klëka

03/06/2026 15:43

Òd zôczątkù maja je wiedzec ò planach gardu Kartuzë, żebë zadzejac w sprawie tak pòzwónégò Szpanerplacu. Chòdzy ò parking przë szasëje Grzëpa Wòlnoscë, niedalek Parkù Solidarnoscë.

Parkùją tam nié leno ti, jaczi mùszą òstawic aùtół, żebë jic do robòtë czë za kùpiszama. Parking stôł sã téż môlã niefòrmalnëch zéńdzeniów dlô miéwców aùtołów, òsoblëwie młodëch. Dało równak czëc òbskôrdżi, że czerowcë na Szpanerplacu smiecą i robią wiele trzôskù, w tim pò nocach. Bùrméster Kartuz Mieczësłôw Gòłuńsczi zapòwiôdôł, że przed parkingã służbë pòstawią wjazdowi szlaban, chtëren równak bãdze sã zamikôł òd ósmi wieczór do trzecy reno – w tim czase nicht z parkingù nie bãdze mógł wëjachac. Na ten cél gmina Kartuzë chce wëdac piãtnôsce tësący złotëch. Procëm temù òstatno wëstąpił radny kartësczégò krézu Artur Socha. Na swòjich spòlëznowëch mediach ùprzëstãpnił filmik ze Szpanerplacu, na jaczim chòdzy ë kôrbi z młodima lëdzama, jaczi akùrôt bëlë na parking zjachóny. Gôdelë mù, że nie dzejô sã tam nick lëchégò, wikszosc lëdzy swòje smiecë zabiérô ze sobą, trzôsk robią le pòjedińczné òsobë, a òni przëjéżdżają le za tim, żebë sã ze sobą integrowac. Socha przekònywô, że park je dosc dalek òd nôblëższich chëczi ë jeżlë ten môl miasto młodim zabierze, przëniesą sã gdze jindze, a mòże to bëc krodzy centrum gardu. Pòkazywô, że na całim parkingù, jednym z nôwikszich w Kartuzach, stoji blós jeden kòsz na smiecë. Bédëje zamòntowac kamérë dlô ùprawieniô bezpiekù miast zamëkac jedurny môl, gdze mògą przëjeżdżac młodi na nocną integracjã.

Źródło i opracowanie własne