Biologòwie i ùrzãdnicë procëm samòrządówcóm. Ti drëdżi gôdają, że nowô fòrma òchrónë rodë w regionie mògłabë baro ùcãżëc żëcé mieszkańcóm.
Samòrządë Kartuz, Serakójc, Chmielna i Lënie są procëm ùdbie ùsadzeniégò w Mirochòwsczich Lasach nowégò nôrodnégò parkù, chtërnégò pòzwa bë miała brzëmiec: „Kaszëbsczi Nôrodny Park”. Òb lato Fùndacjô Rodnô Spôdkòwizna [Fundacja Dziedzictwo Przyrodnicze] prowadzëła zbiórkã pòdpisënków pòd peticją do Radzëznë Ministrów ò ùsadzenié parkù. Terô rëgnãła pòstãpnô peticjô, jakô parkòwi sã sprocëmniwô. Pòdwigniãtô przez biologów dra jinż. Sławòmira Zelińsczégò i Andrzeja Garbalewsczégò inicjatiwa, jakô òkróm òchrónë rodë bë miałã téż zwikszëc turisticzné wôrtnotë regionu i dwignąc jegò prestiż, pòtkała sã z kritiką i strachã ò to, że ògrańczenia wprowôdzoné w związkù z fùnsknérowanim parkù zaszkòdzą lokalny spòlëznie.
Starna z peticją procëm parkòwi wëmieniwô taczé zagrôżbë jak zakazë weńdzeniô do lasa abò wprowôdzenié òpłôtków, sztrôfë za jazdã na kòle czë zbiéranié grzëbów i brzadu, a téż dzejającé w òbéńdze wkół samégò parkù ògrańczenia w gbùrzëznie i bùdownictwie. Procëmnicë ùdbë wskazéwają téż, że ò ùsadzenié KNP starã miało w pierszi rédze strzodowiszcze z Trzëgardu, tak tej ji przëstojnicë ni mają dbë ò realiach żëcégò w òbéńdze jegò mòżebnégò ùtwòrzeniô.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie