Reklama

Szwajcarsczi generôł ò wëdôwkach na òbarnã

Klëka

30/12/2025 10:17

Thomas Süssli. Òdj. Chairman of the Joint Chiefs of Staff from Washington D.C, United States - 191218-D-HD608-0043; zdrzódło: https://en.wikipedia.org/wiki/Thomas_S%C3%BCssli#/media/File:Thomas_S%C3%BCssli_in_2019.jpg

Generôł Thomas Süssli na kùńc swòji służbë jakno pòdwëższi szwajcarsczi armie dôł sã na wëdowiédzã, w jaczi skritikòwôł òbarną strategiã Szwajcarsczi Kònfederacje.

Wódca szwajcarsczich zbrojnëch sëłów Thomas Süssli zéńdze ze stanowiszcza na zôczątkù stëcznika. W sobòtã dwadzestégò sódmégò gòdnika gazéta „Neue Zürcher Zeitung” òpùblikòwała z nim wëdowiédzã. Generał scwierdzył w ni, że Szwajcarskô je militarno dëcht nieprzërëchtowónô na mòżebną kònfrontacjã z Ruską. Òd czasu fùlskalowégò najachùnkù Rusczi na Ùkrajinã i jidącégò za tim czãstszégò dzejaniô rusczich służbów w Eùropie, wëdôwczi Kònfederacje na wòjskò zwikszëłë sã minimalno. Nimò że je to jeden z nôbògatszich krajów na swiece, na òbarnã wëdôwô czile razy mni jak państwa Nordowòatlanticczi Zdrëszënë. Süssli pòdôł, że ni ma mòżebnoscë skùteczny òbarnë przed rakétowima atakama daleczégò sëgù czë fùlskalowim najachùnkã. W przëtrôfkù mòbilizacje, leno jedna trzecô żôłnérzi miałabë fùl ekwipùnk. Generał je dbë, co ùtrzëmiwónô przez Szwajcarskã òd sto òsmëdzesąt lat strategiô neùtralnoscë nie zagwësniwô, że w wëpôdkù wòjnë nie òstónie wcygniãtô do kònfliktu. Gôdôł ò przëmiarach z historie, ale téż wskazéwôł na to, że chòc ni ma wiadë ò rusczich sabòtażach w kraju, to co nômni òsmëdzesąt òsób òstôwającëch w grańcach Szwajcarsczi mô pòrzeszenié z rusczima wëdowiédzowima służbama. Je wiedzec ò cyberatakach, dezinfòrmacje i szpiónach. Na terô rząd chce do dwa tësące trzëdzestégò drëdżégò wëdawac jeden procent krajewégò produktu brutto na òbarnã. Generał Süssli gôdô, że wedle niegò to je wiele za mało.

H.S.Sz.

Czytaj nas w Google

Dodaj do Google

Źródło i opracowanie własne