Reklama

Szwédzczi pòsélc miôł jizbã nazystowsczich pamiątków

Klëka

06/12/2025 12:56

Riksdag – szwédzczi parlament. Aùtór: Ankara, zdrzódło: https://pl.wikipedia.org/wiki/Szwecja#/media/Plik:Riksdagen_June_2011.jpg

Żebë nie zaszkòdzëc partie, i tak ju winowóny przez procëmników ò sympatizowanié z nazyzmã, pòlitik zapòwiedzôł kùńc swòjégò nôleżnictwa.

Szwédzczi gazétnicë z dniownika Expressen zainteresowelë sã przenoszonym biórã nôrodno-kònserwatiwny partie Szwédzczich Demòkratów w gardze Valdemarsvik we Wschódny Gòtalandie. Miéwcą lokalu béł Göran Hargestam, pòsélc do Riksdagù i regionalny przédnik partie. Gazétnicë w czwiôrtk czwiôrtégò gòdnika wlezlë do bióra i midzë dokùmentama nalezlë òsoblëwé zachë, midzë jinszima dwa egzemplarze „Mein Kampf”, albùmë z òdjimkama Adolfa Hitlera czë pùchar z tësąc dzewiãcset trzëdzestégò dzewiątégò rokù dlô serżanta Luftwaffe. Anonimòwi ùszłi nôleżnik partie miôł przekazac dniownikòwi, że przódë w biórze Hargestam miôł całą jizbã fùl nazystowsczich fanów, stalanëch szołmów, propagandowëch ksążków, medalów, pùcharów i jinszich pamiątków pò Trzecy Rzeszë. Spitóny ò to pòlitik rzekł, że to wszëtkò je związóné leno z jegò zainteresowanim historią i militariama, a téż z dôwnëch planów napisaniô ksążczi. Zadeklarowôł równak, że żebë nie psëc wizerënkù partie, dôł sã z ni wëstãpic. W òswiôdczenim Szwédzczi Demòkracë rzeklë, że szónëją decyzjã Hargestama i są zgòdą, że nôlepi bãdze, jak òn òdéńdze z parlamentu i partie.

H.S.Sz.