Reklama

Talibòwie zakazéwają ksążków napisónëch przez białczi

Klëka

21/09/2025 11:18

Talibòwie w Herace; aùtór: bluuurgh; zdrzódło: https://pl.wikipedia.org/wiki/Talibowie#/media/Plik:Taliban-herat-2001.jpg

Pòd pretekstã zaprowôdzaniô islamsczégò prawa Talibòwie ògłosëlë pòstãpné ògrańczenia dlô systémë edukacje, tą razą òkòma wëższi szkòłowiznë.

Nônowszé wskazë rządu Talibów w Afganistanie, òbrobioné przez panel religiowëch ùczałëch i znajarzów, zawiérają piãcdzesątstarnową lëstã ksążków wësztrichniãtëch z programù naùczaniô na afgańsczich ùniwersytetach. Lësta jesz nie je do kùńca ùsadzonô, ale nôgwësni zakôzóné bãdze kòl szescset òsmëdzesąt pòzycjów, jaczé wedle rządu sprocëmniwają sã szariatowi ë Talibanowi. Nôleżnik werifikacjowégò kòmitetu pòcwierdzył, że za niezgódné z islamã òstałë ùznóné wszëtczé ùczbòwniczi napisóné przez białczi. Zdrzącë na témë, zakôzóné ksążczi colemało tikają sã kònstitucjowégò prawa, mùzelmańsczich pòliticznëch rësznotów, prôw człowieka, sztudiów òkòma białków i zôpadny pòliticzny mëslë. Rząd zapòwiôdô, że zlecy napisanié nowëch ùczbòwników dlô zafùlowaniô felënków, jaczé pòwstóną pò wprowadzenim zjinaków w żëcé. Kòmitet nie zajął sã leno ksążkama, bò wëdôł téż nôkôz skùńczeniô z naùczanim òsmënôsce przedmiotów na ùczbòwniach. Afganistan pòd rządama Talibów je jedurnym mùzelmańsczim państwã, jaczé do taczich skrajnosców pòsuwô interpretacjã szariatu, òsoblëwie jeżlë chòdzy ò ògrańczenia w pòùczënie dlô białków – ju terô edukacjô dlô dzéwczãt wëżi jak dwanôsce lat stôrëch w kraju prakticzno nie dzejô.

H.S.Sz.

Załączniki