Reklama

Terroristiczny atak w Kijiwie

Klëka

20/04/2026 10:28

Sprôwca to chłop ùrodzony w Mòskwie z kriminalną ùszłotą i pòzwòlenim na strzélną barniã. Zabił szesc òsób, a jegò zabilë szandarzë.

W sobòtã òsmënôstégò łżëkwiata w Kijiwie doszło do strzélindżi. Je na terô wiedzec ò szesc zabitëch i co nômni sztërnôsce renionëch, z czegò dzewiãc w bòlëcë. Atakòwnik brëkòwôł zaregistrowóny strzélny barnie. Zaczął strzelac do lëdzy na szasëje, zabijającë sztërzech, pòtemù zabarikadowôł sã w supermarkece i wzął zakłôdników – klijentów i robòtników. Jednégò z nich zabił, a jedna renionô tedë przez niegò białka ùmarła w bòlëcë. Pò sztërdzescë minutach bezbrzadnëch negòcjacjów, czej zdżinął jeden z zakłôdników, specjalné służbë dostałë rozkôz likwidacje atakòwnika. Zdżinął na placu. Szandarzë òpòwiôdają, że chłop dzejôł chaòticzno ë bez jegò zabicô niżóden z lëdzy, co òstôwelë kòl niegò w krómie, nie béłbë bezpieczny. Pòtemù służbë pòdałë, że atakòwnik to piãcdzesąt òsmë lat stôri chłop ùrodzony w Mòskwie, jaczi długò żił w doniecczim òbwòdze i miôł kriminalną ùszłotã. W czasu strzélindżi w jegò mieszkanim wëbùchł òdżin, nôgwësni zamiecony przez niegò samégò. Blok béł ewakùòwóny. Mediczny pòmòcë wëmôgało szesc mieszkańców, w tim sztërëmiesãczné dzeckò zatrëté czadzą. Sąsedze atakòwnika gôdają, że chłop zwôł sã Dima, nie przestôwôł z lëdzama i mieszkôł sóm. Docygają, że mòglë gò przësłac Ruscë, le tegò służbë jesz ni mają pòcwierdzoné. Wstãpno zaklasyfikòwelë zdarzenié jakno terroristiczny atak.

H.S.Sz.

Załączniki