To (nie) je pòwiôstka

Sztudérzë drëdżégò rokù kaszëbsczi etnofilologie na Gduńsczim Ùniwersytece rëchtëją edukacjowi projekt pòd titlã „To (nie) je pòwiôstka”, w jaczim przedstôwią brëkòwnikóm spòlëznowëch mediów zamkłosc lëdowëch pòwiôstków tikającëch wëbrónëch dôwnëch kaszëbsczich zwëków i wierzeniów.

Przédnyma zdrojama dlô tekstów są wëjimczi ze słowarzów Bernata Zëchtë czë Sztefana Ramùłta a téż tekstë pòmòrsczé Friedricha Lorentza, ale sztudérzë sygają téż do przekazów zapisónëch przez òjcã lëteracczi kaszëbiznë Floriana Cenôwã, a nawetka do tekstów tak stôrëch jak kronika „Pomerania” Tomasza Kancowa.
Nagrania tekstów przeczëtónëch przez sztudérów, ùbòkadnioné przez ilustracje aùtorstwa sztudérczi a kaszëbsczi céchôrczi Aleksandrë Kreft, jidze nalezc na profilach projektu w spòlëznowëch mediach na Facebooku, Tiktoku i Instagramie. Ju mòże sã tam doznac ò métlu na ùrzasné mòrë, a w nôblëższim czasu òbzérnicë doznają sã midzë jinszima, skądka wedle dôwnëch pòwiôstków pòchôdają grzëbë, jak przódë lat wëzdrzała ùczba czarownictwa, a téż jak pùrtczi sëszëłë dëtczi.
Jednym z bùtnowëch interesariuszów kaszëbsczi etnofilologie na Gduńsczim Ùniwersytece je Mùzeùm Kaszëbskò-Pòmòrsczi Pismieniznë i Mùzyczi w Wejrowie, gdze sztudérzë dojeżdżają na prakticzną nôùkã kaszëbsczégò jãzëka w òbrëmienim zajmów z kùlturë żëwégò słowa pòd òkã robòtnika mùzeùm dra Dariusza Majkòwsczégò. Projekt „To (nie) je pòwiôstka” je robiony na zarechòwanié z tëch zajmów, a jegò célã òkróm rozkòscérzaniô kaszëbsczi kùlturë je téż promòcjô czerënkù i przedstawienié brzadu zajmów w wejrowsczim mùzeùm.

Pòwiôstczi nagróné przez sztudérów nalézta na starnach:

https://www.facebook.com/profile.php?id=61572803399806

https://vm.tiktok.com/ZNeoJxV6m/
https://www.instagram.com/reel/DFgG62RM7yU/?igsh=MXY0NDJjajQ0MXJuMw==