Reklama

Tragedné wòjnowé scenë w Kòscérznie

Klëka

02/12/2025 10:31

Z Kaszëb, Tragedné wòjnowé scenë Kòscérznie - zdjęcie, fotografia

W òbrëmim Dnia Pamiãcë Wëwiozłëch zrëchtowelë midzë jinszima historiczną rekònstrukcjã, gdze w role òfiarów i sprôwców weszlë dzejarze lokalnëch òrganizacjów.

W niedzelã trzëdzestégò smùtana w Kòscérznie zrëchtowelë Dzéń Pamiãcë Wëwiozłëch, jaczi przëwdôrzô wëwòżenié mieszkańców kòscersczégò krézu przez Niemców w smùtanie tësąc dzewiãcset trzëdzestégò dzewiątégò rokù do Generalny Gùbernie. Tedë wiele òd tëch wëwiozłëch ju nigdë pózdni ni miało leżnoscë wrócëc na Kaszëbë. Latosé ùroczëznë zaczãłë sã mszą w kòscele Swiãti Trójcë w Kòscérznie, jaką òdprawił ksądz Antón Bączkòwsczi. Pòtemù pòd pamiãtnikòwą tôflą bëłë złożoné kwiatë, a na miesczim rënkù ju trzecy rôz bëła historicznô rekònstrukcjô. Mieszkańcë mòglë òbaczëc scenë aresztowaniów, przemarszów i egzekùcjów. W zrëchtowanié rekònstrukcje ùdzél wzãlë harcerze, part Kaszëbskò-Pòmòrsczégò Zrzeszeniégò w Łubianie i nôleżnicë stowôrë „Kòscerskô Chëcz”. Przédnym pòdjimarzã Dnia Pamiãcë Wëwiozłëch je szandara i harcérz Pioter Kwidzyńsczi. Òn gôdô, że przédnym célã je szérzwienié wiadë ò historie drëdżi swiatowi wòjnë w kòscersczim krézu.

H.S.Sz.