Reklama

Tëreckô biôtkùje z dżihadistama

Klëka

31/12/2025 11:29

Ali Yerlikaya. Òdj. burak demir - https://www.flickr.com/photos/202118108@N06/54262268938/; zdrzódło: https://en.wikipedia.org/wiki/Ali_Yerlikaya#/media/File:%C4%B0%C3%A7i%C5%9Fleri_Bakan%C4%B1_Ali_Yerlikaya.jpg

Sztërësta sétmëdzesąt dwùch lëdzy òd zôczątkù gòdnika zatrzimałë tërecczé służbë. Doszło téż do òsmëgòdzynny òblédżi chëczë w jednym z gardów.

Tëreckô pòlicjô i antiterroriscë òb gòdnik przeprowadzëlë czile masowëch aresztowaniów a téż dochôdanié procëm Islamsczémù Państwù. Docygelë, że terroriscë bãdą planowelë ataczi na chrzescëjón òb czas Gòdów a téż Nowégò Rokù. Rząd pòdôł, że ùchwôcony nôleżnicë i przëstojnicë Islamsczégò Państwa pò przesłëchaniach pòcwierdzëlë te domësłë. Parłãcznô lëczba zatrzimónëch òd zôczątkù miesąca do weekendu pò Gòdach to sto piãtnôsce lëdzy. W pòniedzôłk dwadzestégò dzewiątégò gòdnika w gardze Yalova nad mòrzã Marmara szandarzë naszlë terroristów w jedny chëczë. Ti zaczãlë sã barnic przed aresztowanim. Doszło do dérëjący òsmë gòdzyn strzélindżi. Zdżinãło trzech szandarów i szesc biôtkòwników Islamsczégò Państwa – wszëtcë, jaczi ùkriwelë sã w chëczë. Bëlë òbëwatelama Tërecczi. Pòstãpnégò dnia doszło do pòstãpny serie aresztowaniów, ò czim do wiadë dôł minister bënowëch sprôw Ali Yerlikaya. W dwadzesce jeden prowincjach aresztowelë trzësta piãcdzesąt sétmë òsób pòrzeszonëch z Islamsczim Państwã. Są westrzód nich pòwiązóny z grëpą zlikwidowóną w pòniedzôłkòwi strzélindze, lëdze jaczi nibë zbiérelë dëtczi na charitatiwné dzejanié, a pò prôwdze na Islamsczé Państwò, a téż lëdze pòdezdrzóny ò rëchtowanié ataków na Nowi Rok.

H.S.Sz.

Źródło i opracowanie własne