Reklama

Trëją himalajistów dlô dëtków

Klëka

04/04/2026 11:24

Mount_Everest_as_seen_from_Drukair2.jpg: shrimpo1967 derivative work: Papa Lima Whiskey 2 (talk); zdrzódło: https://pl.wikipedia.org/wiki/Mount_Everest#/media/Plik:Mount_Everest_as_seen_from_Drukair2_PLW_edit.jpg

Rząd w Katmandu òstôł wezwóny do òdpòwiescë na nieùtcëwi ùgôdënk midzë górsczima prowadnikama, latawnyma firmama a bòlëcama.

W Nepalu w òbrëmim Mount Everestu dérëje praktika zarôbianiô na wspinôczach przez jich pòdtruwanié. Prowadnicë pò górach dodôwają do jich jestkù pòwszechno przistãpné produktë jak òczëszczoną sodã, sëré kùrzé miãso abò gòwiónka òd szërów. Tegò tipù trëtczi prowadzą himalajistów przede wszëtczim do drzistówczi. Przez nacësczi prowadników dôwają równak wiarã, że je to ù nich symptom wëszawny chòroscë i zgôdzają sã na wezwanié do nich pòmòcë. Latawné firmë slą helikòptrë, co zabiérają jich do bòlëców. Prowadnicë mają za to płaconé òd latawnëch firmów i zarządzënów bòlëców. Kòsztë transpòrtu helikòptrã – nawet pò cziledzesąt tësący dolarów – schôdają na ùbezpiekòwé firmë. Bëłë rechòwóné za kòżdã òsobã, nawet jeżlë helikòpter òb czas jedny lecbë zabiérôł jich pò czile. Na taczi ôrt òd dwa tësące dwadzestégò drëdżégò do dwa tësące dwadzestégò piątégò rokù òcëganionëch bëło sztërë tësące sétmëset òsmëdzesąt dwùch himalajistów, a rechùnczi bëłë jim wëstawioné w sëmie za dwadzesce miliónów dolarów. Midzënôrodné ùbezpiekòwé firmë wzéwają nepalsczi rząd do interwencje procëm układowi prowadników, pilotów i lékarzów. Jeżlë ten sã tegò nie pòdjimie, grożą wëcopanim ùbezpiekù na wspinanié w òbrëmim Mount Everestu, co je jednym z machtniészich zdrojów zôróbkù dlô Nepalu.

H.S.Sz.

Źródło i opracowanie własne