Zapòwiescë przejãcô Kanadë przez Stanë biwałë òdbiéróné jakno szpòrt abò leno propagandowé zéwiszcze, le wódcë òbùch krajów mają tã ùdbã za realną – Trump za szansã, Trudeau za zagrôżbã.
We wëdowiédzë dlô telewizje Fox News prezydent Zjednónëch Stanów Donald Trump òstôł spitóny ò to, czë ùdba aneksje Kanadë przez USA je czims prôwdzëwie rozwôżónym. Trump to pòcwierdzył. „Jô mëszlã, że Kanadze bë bëło wiele lepi, czej bë bëła piãcdzesątim pierszim stanã, kò më na Kanadze tracymë rok w rok dwasta miliardów dolarów. Jô nie pòzwòlã, żebë to sã dzejało” – gôdôł pòlitik, nawlékającë do hańdlu midzë państwama, w jaczich Stanë kùpają produktë z nôtërnëch doczëznów jak petrólka. W ti wëmianie Stanë tracą dëtczi. Amerikańsczi prezydent scwierdzył téż, że kanadijsczi rząd wëdôwô dzysdnia mni dëtków na wòjskò, bò je ti dbë, że w przëtrôfkù zagrôżbë USA bãdze barnic swòjégò sąsada. W ùszłi piątk sódmégò gromicznika ò realnoscë grozbów aneksje gôdôł w nieòficjalny wëpòwiescë premiéra Kanadë Justin Trudeau. Wedle niegò, USA prażi przejic kanadijsczé nôtërné zôsóbczi, a aneksjô przez hańdlową wòjnã bë bëła do tegò nôprostszą dargą. Minister bezpiekù David McGuinty zapòwiôdôł ùmòcnienié kanadijsczi grańcë. Rząd Kanadë chce na to wëdac miliard trzësta tësący kanadijsczich dolarów.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie