Reklama
Trump chce wësłac wòjska do Nigerie
05/11/2025 09:18
Òbarna mòrdowónëch chrzescëjón mô bëc przëczëną specjalny òperacje zapòwiedzóny przez amerikańsczégò prezydenta. Rząd sprocëmniwô sã òbwinóm, le przëznôwô, że pòmòc bë sã przëdała.
Prezydent Zjednónëch Stanów Donald Trump pòstawił Departament Wòjnë w pòszëkù. Kôzôł rëchtowac wòjskò do mòżebny wòjskòwi òperacje w Nigerie. Cwierdzy, że nigerijsczi rząd pòzwôlô na masowé mòrdarstwa chrzescëjanów. Zapòwiedzôł strzimanié wszeldżi pòmòcë czerowóny przez Stanë do Nigerie i wësłanié wòjsków do biôtczi z islamistama, jaczi zabijają chrzescëjanów w terroristicznëch atakach. Jak napisôł na swòji platfòrmie na Truth Social: „Jeżlë duńdze do atakù, bãdze òn chùtczi, òstri i słodczi, tak jak czej terroriscë atakùją najich drodżich chrzescëjanów!”. Prezydent Nigerie Bòla Tinubu przékùje temù, żebë chrzescëjanie mielë bëc w Nigerie òsoblëwie ùcyskóną grëpą, jaczi rząd bë nie barnił. Gôdô, że pò prôwdze są w kraju regionë, gdze bùtnowé wspiarcé bë sã przëdało, ale dochôdô w nich tak do dokazów islamisticzny jak chrzescëjańsczi ekstremiznë, jak téż do trójny przemòdżi na etnicznym spòdlim czë sztridów pasturzów z gbùrama. Wedle niegò je to jiwer, jaczi tikô całą spòlëznã i to ni ma ùdokaznieniô winowac Nigeriã ò wrogòsc wedle chrzescëjanów. Pòmòc midzënôrodny spòlëznë bëłabë pòmòcnô, ale wrëgniãcé Amerikón na nigerijską zemiã mògłobë zagrozëc samòstójnoce kraju. Dorôdca prezydenta Daniél Bwala na pitania ò grozbã amerikańsczi specòperacje òdpòwiôdô, że rząd nie òdbiérô słów Trumpa dosłowno, bò ten je znóny ze specyficznégò ôrtu wëpòwiescë. Wedle niegò amerikańsczi prezydent mô w sercu i wòlë pòmòc Nigerie w biôtce z zagrôżbama bezpiekù.
H.S.Sz.
Załączniki
Aktualizacja: 05/11/2025 18:53
Reklama
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze opinie