Reklama

Trzënôscelôtkòwie do sôdzów

Klëka

29/10/2025 19:11

Gamla Stan, Sztokholm; aùtór: Bengt Nyman from Vaxholm, Sweden; zdrzódło: https://pl.wikipedia.org/wiki/Sztokholm#/media/Plik:Stockholm_8721-B_(9870833193).jpg

Òd zôczątkù rokù w szwédzczich sôdzach bãdą rëchtowóné place, do jaczich òd lëpińca przińdnégò rokù trafią nôscelôtkòwie skôzóny midzë jinszima za przesprawë z ùżëcym barnie.

W Szwédzce ùchwôlëlë prawò, jaczé òbniżi wiek prawny òdpòwiedzalnotë z piãtnôsce do trzënôsce lat. Pò sygniãcym tegò wiekù, nôscelôtkòwie bãdą mòglë bëc zamikóny w sôdzach w specjalnëch dzélach, jaczé Sôdzewô Służba bãdze wëdzelëwac w ternym òbjimie prizów òd zôczątkù dwa tësące dwadzestégò szóstégò rokù. Wstãpno mô to bëc òd sto do sto piãcdzesąt placów dlô wszëtczich niedozdrzeniałëch skôzónëch. Przesprôwcë trzënôsce i sztërnôsce lat stôri nie bãdą mielë w zakładach łączbë z tima òd piãtnôstégò do sétmënôstégò rokù żëcégò ani z ùstnyma. Apartné dzéle mają bëc dlô knôpów a dzéwczãt. Òb czas sztrôfë nôscelôtkòwie bãdą mielë edukacjową i terapeùticzną òpiekã. Zjinaka wchôdô w żëcé òd pierszégò lëpińca dwa tësące dwadzestégò szóstégò rokù i bãdze òbrzeszëwac piãc lat. Ji wprowadzenié je reakcją na roscącé przetrôfczi przesprawiégò ù nieùstnëch, w tim z ùżëcym barnie i w zòrganizowónëch przesprôwczich karnach. Rekrutëją jich przede wszëtczim narkòtikòwé gandżi òkòma wikszich gardów.

H.S.Sz.