Reklama
Tësąc eùro za starżã kòl zélińta
30/12/2025 10:04
Lëdze z bùtna nie dôwają pòkù przedstôwcë rzôdczégò gatënkù. Badéra mòrsczich susków zabédowôł, żebë mieszkańcë nadmòrsczi môlëznë strzeglë jegò spikù.
Na pieglëszczach môlëznë Numana w Ankóńsczi Marchie we westrzédny Italsce w slédnym czasu ùwidzało sã òdpòczëwac jednémù zélińtowi. Je to przedstôwca zagrożonégò gatënkù strzódzemnomòrsczégò mniszka, jaczi je téż òsoblëwie rzôdczi w tim parce Adriatikù – rëchli jidze gò pòtkac na wschódnym sztrądze. Czej gòsc wëbierze so plac, wiedno leżi na nim dłudżi czas, przez co scygô bôczënk turistów i przejezdnëch. Ti z cekawòscë pòdchôdają zrobic sobie òdjimczi ze zwierzëcã, ale téż z zajisceniô chcą sprawdzëc, czë je z nim wszëtkò richtich. Tedë zélińt bùdzy sã i wrôcô do wòdë. Wiada ò corôz czãstszich przëtrôfkach niebrëkòwnégò bùdzeniô mniszka trafiła do znajarza gatënkù, Emmanuele Copolë. Badéra w internetowim pòsce wëwidnił, że dłudżé leżenié na pieglëszczu dlô tegò zélińta je dëcht normalné – strzódzemnomòrsczi mniszk brëkùje nawet wicy jak dwadzesce sztërzech gòdzyn, żebë wëpòczic. W tim czasu nicht bë ni miôł mù przeszkadzac, chòc wôrt, żebë chtos miôł na niegò bôczenié. Dlôte Copola ògłosył, że dô nôdgrodã tësąc eùro, jeżlë mieszkańcë Numanë zarzeszą kòmitet dlô zélińta. Wiedno jak zmerkają, że gòsc spi gdzes na ùbrzegù, mielëbë sã mù przëzerac a téż pilowac, żebë nicht do zwierzëca nie pòdlôżôł. Kòmitet mógłbë téż sã zajic edukòwanim mieszkańców ò zwëkach gatënkù.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze