Nowé prawò przëjãté w Aùstralie je pierszim tak òstrim na swiece, niedopùszcziwającym ùtrzimaniô kòntów dzecy za zgòdą jich rodzëców.
We czwiôrtk 28. smùtana senat Aùstralie dôł zgòdã na nowi ùstôw wprowôdzający wiekòwą grańcã dlô brëkòwników spòlëznowëch mediów. Wedle nowégò prawa, òdtądka firmë czerëjącé taczima mediama bãdą òbrzeszoné sprawdzac wiek swòjich brëkòwników i òdcënac przistãp do swòjich ùsługów dzecóm młodszim jak 16 lat. Nieùsłëchanié ti regùlacje bãdze kòształo firmë do 50 mln aùstralijsczich dolarów sztrôfë.
Kùńcowé zacwierdzenié ùstawù przez Jizbã Reprezentantów je ju gwësné z pòzdrzatkù na to, że rząd mô w parlamence wikszosc. Prawò mô wéńc w żëcé za rok.
Chòc rząd przekònywô ò brëkòwnoce tegò ùstawù ùdokazniwającë gò bezpiekã dzecy w Internece, krótczi czas jegò òbgadiwaniô i pòspiéwné dzejanié pòtikają sã z kritiką. Miéwcowie spòlëznowëch mediów, ale téż òpòzycjowi pòliticë i bùtenrządowé òrganizacje dôwają bôczënk na niejasnosc ùżëti w ùstawie definicje spòlëznowégò medium, a téż wątpią w skùtkòwnosc zakazu. Technika sprôwdzaniô wiekù je wcyg testowónô. Nad to prawò mô bëc téż letczé do òbéńscô przez brëkòwanié jadrów VPN, czegò aùstralijsczé prawò nie regùlëje.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie