Reklama

W Bëtowie chcą zbùrzëc symbòl pòlskòscë

Klëka

31/03/2026 11:48

Panorama Bëtowa. Òdj. Aneta Pawska; zdrzódło: https://pl.wikipedia.org/wiki/Byt%C3%B3w#/media/Plik:Zamek_w_Bytowie,_widok_z_drona.jpg

Lëchô technicznô stojizna i planë przebùdowë placu przegôdałë miesczich ùrzãdników do tegò, żebë pamiãtnik rëmnąc, a miast niegò pòstawic pózdni jinszi.

Wëszëznë Bëtowa chcą przebùdowac Plac Krofeya, gdze dzysdnia je parking dlô aùtołów a téż òbgrodzony płotã dużi Pamiãtnik Swiatowida. Pòstawilë gò w szescdzesątëch latach jakno darënk bëtowsczich rzemiãsników na piãc lat przed òbchòdama Tësąclatégò Pòlsczégò Państwa. Dôwni kòl niegò bëłë ùroczëznë Nôrodnégò Swiãta Òdrodë Pòlsczi, a pò zjinace ùstawù pòtikelë sã kòl niegò młodi. Ju trzënôsce lat nazôd miesczi ùrząd miôł równak dostóné ekspertizã, wedle jaczi pamiãtnik nadôwô sã leno do zbùrzeniô. Przez wnet sétmë dekadów nie béł òdnôwióny, a że zaczinôł ju sã sëpac, w kùńcu dlô bezpiekù pòstawilë wkòl niegò płot. Miesczi architekt Leszk Neubauer gôdô, że terô ju jegò rozbiérka bãdze mùszebnô, bò jinaczi placu nie mdze szło òdnowic. Mieskô Radzëzna równak ùznała, że wôrt pòtemù na jegò placu pòstawic jakąs nową sztaturã. Miałabë òna przëbaczëwac tã samã dejã, jakô towarzëła przë stôwianim Pamiãtnika Swiatowida. Ten miôł zaznaczac dłudżé trëwanié Pòlôchów na bëtowsczi zemi, co wërôżô wërëté wkòl wizerënkù òrzła zéwiszcze: „Më bëlë, më jesmë, më bãdzemë”.

H.S.Sz.

Źródło i opracowanie własne