Pò pòstãpnym wëpôdkù z ùdzélã turistów Xi Jingping kôzôł pòdwëższëc sztandardë bezpiekù w òbsłëdze turisticzny rësznotë.
W niedzelã czwiôrtégò maja pò pôłnim kòl gardu Qianxi na rzéce Liuchong w pôłniowò-zôpadnëch Chinach wëwrócëłë sã sztërë bôtë z turistama. Wstãpno je scwierdzoné, że na kòżdi bôt mògło wéńc pò sztërdzescë òsób, a na niżóden òd tëch sztërzech nie wlazło jich za wiele. Nimò to, czej narôz przëszła bùrzô z mòcczim wiatrã i gradã, òsmëdzesąt sztërzech pasażérów nalazło sã w wòdze. Do bòlëców trafiło sétmëdzesąt òsób, a zdżinãło dzesãc – cało slédny òfiarë òstało nalazłé w wòdze pòstãpnégò dnia. Prezydent Xi Jingping miôł gôdóné ò mùszebnocë fùlnégò zaangażowaniô sã służbów w akcjã szukaniô i retowaniô pasażérów. Dôł téż bôczenié na to, że w slédnym czasu w Chinach dochôdô corôz czãscy do smiertnëch wëpôdków z ùdzélã turistów; na przëmiôr dwa miesące nazôd jednôsce turistów zdżinãło, czej jich bôt zderził sã z industriowim òkrãtã. Chińsczi wódca nakôzôł w związkù z tim pòdwignąc sztandardë pùblicznégò bezpiekù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie