Bédënczi bãdą zbiéróné przez dwa tidzenie, a w czerwińcu mô bëc welowanié. Bùdżet to trzë miliónë złotëch.
Òd sobòtë pierszégò strëmiannika do niedzelë szesnôstégò strëmiannika Chòniczanie mają leżnosc zgłosziwaniô swòjich bédënków do pierszégò w historie Chònicczégò Òbëwatelsczégò Bùdżetu. Do zgłoszeniô brëkòwné je trzedzescë pòdpisënków mieszkańców Chòniców. Kòszt projektu ni mòże bëc wikszi jak trzë miliónë złotëch i mùszi jimac sã gwôsnëch zadaniów gminë. Chòdzy ò pòdjimniãca taczé jak inwesticje i rozegracje z òbéńdë kùlturë, spòrtu, rekreacje i kòmùnalnëch sprôw. Ùchwôlënk miesczi radzëznë ò ùsadzenim òbëwatelsczégò bùdżetu òstôł pòdjimniãti łoni w gòdnikù. Wedle niegò, welowac nad terô przëjimónyma projektama Chòniczanie bãdą latos w czerwińcu, a ò wënikach doznają sã na zôczątkù lëpińca. To pòdjimniãcé, jaczé wëbierzą, mô bëc zrealizowóné w przińdnym rokù. Drobnotë tikającé sã bùdżetu mòże przeczëtac na specjalno ùsadzony internetowi starnie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie