Reklama

W Chònicach stónie pamiãtnik klôsztornicë-mãczelniczczi

Klëka

09/11/2025 16:08

https://www.archiwalna.siostryzorlika.pl/

Sostra Adelgùnd Tumińskô òsta zamòrdowónô, czej Czerwionô Armiô wrëgnãła do Chòniców. Ji beatifikacjowi proces je strzimóny, ale Chòniczanie chcą jã ùpamiãtnic na jinszi ôrt.

Pòsélc Aleksander Mrówczińsczi z Chòniców chce rëgnąc z pùbliczną zbiérką dëtków na pòstawienié pòmnika sostrë Adelgùnd Tumińsczi. Dôł ò tim do wiadë na slédny sesje miesczi radzëznë bùrméster Chòniców Arseniusz Finster, do jaczégò pòsélc Mrówczińsczi zgłosył sã z ùdbą. Bùrméster rzekł, że gard wparłãczi sã w pòdjimniãcé. Pamiãtnik mô stanąc w ògardze sostrów francyszkanków, w jaczim òstała pòchòwónô pò tim, jak w tësąc dzewiãcset sztërdzestim piątim rokù zgwôłcył i zamòrdowôł jã żôłnérz Czerwiony Armie, czej stanãła w òbarnie jinëch klôsztorniców w pòdzemiach dôwny Bòlëcë swiãtégò Bòromeùsza w Chònicach. Beatifikacjowi proces mãczelnicë je na baro wstãpnym etapie – rôz rëszony ùstôł z pòzdrzatkù na felënk zdrzódłów i znikniãca slédnëch swiôdków przez dzejania kòmùnisticznëch wëszëznów pòwòjnowi Pòlsczi. Pòsélc Mrówczińsczi zapòwiôdô, że sztatura mãczelniczczi z Chòniców bãdze pòstawionô niezanôleżno òd tegò, czë ùdô sã zwënégòwac ji beatifikacjowi proces. Mô to bëc ùgôdóné z sostrama, jaczé dzysdnia dozérają grobù sostrë Adelgùnd.