Reklama

W człëchòwsczim krézu pò chëczach błądzą szachlarze

Klëka

30/10/2024 18:17

Òdj. facebookòwô starna Ùrzãdu Gminë Człëchòwò

Na slédnym pòtkanim Radzëznë Gminë Człëchòwò wójt Paùel Dżibczińsczi [pòl. Gibczyński] zaprzékòwôł jaczimlebądz związkóm Ùrzãdu z karnama bédëjącyma wzãcé kreditu.

Gmina Człëchòwò je ju trzecą gminą w krézu, w jaczi w slédnym czasu je czëc ò próbach pòdôwaniô sã za przedstôwców samòrządowi administracje. Przódë tôczel tikôł sã gminów Przechlewò i Kòczała, w jaczich bëłë przëtrôfczi szachlarzów chòdzącëch pò chëczach i domôgającëch sã wpùszczeniô bënë w célu kòntrolë piécków, czej ne gminë taczich kòntrolów nie prowadzą.

Terô szlachòwno dzejô sã we wiesczi gminie Człëchòwò. M.jin. we wsach Seroczëno i Pólnica pòjawilë sã falszewi przedstôwcë firmów bédëjącëch mòntôż fòtowòltajiczi z programu „Czësti Lëft”, jaczi pòdsuwelë mieszkańcóm do pòdpisaniô papiorë z ùdowierzenim do wzãcô kreditu na ten cél – mielë sã przë tim pòwòłëwac na związczi z gminą. Na slédny sesje radzëznë gminë 29. rujana wójt Paùel Dżibczińsczi dôł na bôczenié, że w òbrëmim programù „Czësti Lëft” gmina bédëje mieszkańcóm pòmòc za darmôka, a téż że ùrzãdnicë ani bùtnowé firmë nie dostôwają mòcë braniô na mieszkańców kreditów. Wójt przestrzégł przed szachlarzama i zachãcył, żebë przëtrôfczi pòtkaniô z nima zgłaszac na pòlicjã.

H.S.Sz.