Reklama

W Gdinie stónie nowi żeglarsczi òstrzódk

Klëka

30/10/2025 15:35

Òdj. Min. Spòrtu i Turisticzi. Prasowé mat.

Projekt mô bëc skùńczony przed mésterstwama swiata w żeglarstwie za dwa lata, czej wëdarzenié gòscëc bãdze Gdiniô.

We strzodã dwadzestégò dzewiątégò rujana minister spòrtu i turisticzi Jakùb Rutnicczi pòtkôł sã w Gdinie z prezydentką gardu Aleksandrą Kòsórk (pòl. Kosiorek), radnyma, a téż nôleżnikama Yacht Klubù Pòlsczi Gdiniô i Miesczégò Żeglarsczégò Klubù Arka. Témą pòtkaniô bëła bùdowa w miesce Òlimpijsczégò Żeglarsczégò Centrum. Òno bë miało wesprzéc rozwij żeglarstwa, szkòlenia i cwiczënczi tak dlô lokalnëch karnów jak dlô nôrodny kadrë. Projekt bùdacje òstrzódka je ambitny, ale ni ma na niegò za wiele czasu, bò gard chce miec gò skùńczoné przed Mésterstwama Swiata World Sailing w dwa tësące dwadzestim sódmim rokù. Prawie tedë to Gdiniô mô bëc gòspòdarzã rozegracje. Prezydentka Gdinie òpòwiôdała téż ò tim, że projekt przëdôłbë sã miastu na dłudżé lata, bò ju terô w żeglarsczich klubach cwiczi kòl trzësta piãcdzesąt sztëk dzecy i młodzëznë, a stwòrzenié nowégò centrum mòże zachãcëc jesz wicy òsób do tegò spòrtu.

H.S.Sz.