Reklama
W Indiach zaselë blónë, żebë roznëkac smòg
25/10/2025 19:19
Ùdba je takô, że rakétama halô sã do atmòsferë związczi mającé dac za niedługò deszcz. W stolëcë Indiów spróbòwelë tegò pierszi rôz i terô żdżą za òpadama.
Òd hindusczégò swiãta widu Diwali, fejrowónégò w pòniedzôłk dwadzestégò rujana, w Delhi w Indiach òstro pògòrsził sã kwalitet lëftu. Przëczënic sã do tegò mògłë pùszczóné w lëft race i petardë. We wtórk reno normë zawieszonégò pichù ò strzédnicë nié wikszi jak dwa i pół mikrométra, jaczé Swiatowô Òrganizacjô Zdrowiégò ùznôwô za nôniebezpieczniészą frakcjã smògù, bëłë w gardze przekroczoné piãcdzesąt szesc razy. Do piątkù reno stãżenié spadło i bëło blós dwadzesce sztërë razy wikszé òd normów. Òb ten czas do bòlëców w indijsczi stolëcë zaczãło sã zgłaszac corôz wicy pacjentów, co mielë jiwrë z dechã. Stołeczny minister strzodowiszcza Manjinder Singh Sirsa we czwiôrtk wieczór dôł do wiadë, że wëszëznë gardu dałë sã na wëzwëskanié przódë niebrëkòwónégò métla. Przeprowadzëlë testowi lot rakétów mającëch dotëgòwac do atmòsferë chemiczné związczi, chtërne za czile dni – wedle òbtaksowaniów we strzodã dwadzestégò dzewiątégò rujana – mają dac deszcz, ten pò spadniãcym na gard mô rozrzedzëc zalégający smòg i ùprawic jakòsc lëftu. Nazéwô sã to zaséwanim blónów. Ta technologiô mòże dac timczasową zelgã, ale je téż wiedzec, że za czãsté pòwtôrzanié procesu rzeszi sã téż z zagrôżbą sprawieniô sëchégò lëftu, co pò wrócenim smògù zjiscy jesz lëchszé warënczi. Stolëca Indiów blónë zasała pierszi rôz, a znajarze żdżą, jaż òkôże sã, co to dô.
H.S.Sz.
Reklama
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze opinie