Òb czas bómbardowaniô przepsprôwczich karnów w stanie Zamfara w nordowo-zôpadny Nigerie ùcerpielë cywilowie, jaczi sami biôtkòwelë z banditama.
W weekend nigerijsczé wòjskò prowadzëło na terenie stanu Zamfara òperacjã procëm bandicczim karnóm, jaczé napadiwają na gbùrów i jich dobëtk. W dzejaniach bierze ùdzél latawizna, jakô szukô za skùpiznama przesprôwców i spùszczô na nich bómbë. Gùbernatór stanu Dauda Lawal w òswiôdczenim chwôlił skùtkòwnosc òperacje, dzãka jaczi aktiwnosc przesprôwców òsta mòcno ògrańczonô, ale wspòmniôł téż ò òmiłce, jakô zdarzëła sã w sobòtã 11. stëcznika w nocë. Pilot bómbòwca òmilił sã i zbómbardowôł grëpã cywilów we wsë Tungar Kara. Zdżinãło nômni 20 lëdzy, ale dérëje szëkba za pòstãpnyma òfiarama. Zabiti òstelë nôleżnicë môlowëch sëłów cywilny starżë i samòòbarnë, jaczi sami sztót rëchli wënëkelë banditów ze wsë i prawie do ni wrôcelë. Gùbernatór Lawal złożił kòndolencje mieszkańcóm wsë i zagwësnił ò mòdlëtwie za zabitëch cywilów. Rzecznik Nigerijsczich Lëftowëch Sëłów Olusola Akinboyewa dôł do wiadë, że ju rëgnãła wëdowiédzô w sprawie tragiczny zmiłczi pilota.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie