Reklama

W sniegù, w cemżë, ze skrąconą kòstką i rozladowóną mòbilką

Klëka

31/01/2026 13:58

Pòslizniãcé sã mògło kòsztac żëcé białkã z Tëpadłów. Ùretelë jã szandarzë z Krézowi Kòmendë Pòlicje w Pùckù.

We czwiôrtk dwadzestégò dzewiątégò stëcznika wieczór szandarzë z Pùcka na patrolu jachelë przez Tëpadłë w gminie Wiôlgô Wies. W jedny smioce kòl nieòbswiécony drodżi pòd lasã zmerkelë człowieka. To bëła białka, jakô sã pòsliznãła na lodze i skrącëła kòstkã. Nie bëła w sztãdze pòwstac i sama chòdzëc. Ji wòłaniów ò pòmòc nicht nie czuł. Stegną, kòl jaczi sã zwrócëła, lëdze rzôdkò chòdzą. Zazwònic do blisczich téż ni mògła, bò rozladowała sã ji mòbilka. W smioce leżała ju czile gòdzyn i czejbë nié szandarzë, mògłabë nocë nie przeżëc. Wezwóny retownicë scwierdzelë ù ni wëchłodzenié i zabrelë jã do bòlëcë we Wejrowie. Pòlicjô przëbôczëła, żebë òpasowac na terné warënczi ë wiedno sã przërëchtowac na wëpôdczi, czejbë bëła nama brëkòwnô pòmòc. Prosëlë téż, żebë dawac bôczenié na môle rzedzy dozéróné przez lëdzy i trzëmac tã swiądã, że mróz je jawerną zagrôżbą dlô żëcégò.

Na spòdlim:
https://nadmorski24.pl/aktualnosci/78027-wolala-o-pomoc-w-mrozie-i-ciemnosci-policjanci-uratowali-lezaca-w-zaspie-kobiete
https://www.zawszepomorze.pl/artykul/24562,lezala-w-sniegu-ze-skrecona-kostka-i-rozladowanym-telefonem-zauwazyli-ja-policjanci

Źródło i opracowanie własne