W halë, jakô zeżôlëła sã we Gduńskù piątégò gromicznika, składowóné bëłë midzë jinszima kòła MEVO. Òkôzało sã, że bëła tam téż produkcjô narkòtików.
Na prasowi kònferencje we czwiôrtk sétmënôstégò łżëkwiata prokùratura i pòlicjô dałë do wiadë, jakô nôgwësni bëła przeczëna ògnia zabëtkòwi halë prze szasëje Sennicczi na gduńsczim Trélu z gromicznika. Służbë zatrzimałë na Pòmòrzu i na Mazowszu trzech chłopów, jaczi mielë w halë prowadzëc krëjamną produkcjã narkòtików, òsoblëwie kléfedronu. W jich labòratorium miało duńc do wëbùchù, jaczi béł zdrzódłã ògnia. Znajarze pòcwierdzëlë, że płomienie pòchôdałë z zażôleniô sã chemicznëch substancjów. Dwaji chłopi, jaczi tedë bëlë na placu, zwiornãlë, nikòmù nie gôdającë ò ògniu, ani nie wzéwającë ògniowi starżë, żebë ùkrëc swòjã nielegalną produkcjã. Dokazë na niã na mòbilkach, laptopach i jinszi elektronice szandarzë nalezlë w jich mieszkaniach. Dostóną terô òbwinã sprawieniô ògnia, jaczi zagrôżôł żëcémù i zdrowiémù wiele òsób a téż miectwù wiôldżi miarë, a jesz òbwinã wëtwôrzaniô narkòtików.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie