Wielëna òfiarów ju je wikszô jak w szlachòwnëch katastrofach z ùszłëch lat. Dérëje retënkòwô akcjò.
W sobòtã wieczór (22. séwnika) w dwùch blokach kòpalnie kamiannégò wãgla w Tabas w irańsczi prowincje Pôłniowi Chòrasan béł wëbùch metanu. W tim czasu w kòpalnie dérowała robòta. Je wiedzec ò 51 zabitëch i 20 zrenionëch górnikach, ale co nômni 22 wcyg nie je nalazłëch. Kòpalniô zajimô wiéchrzëznã wicy jak 30 tës. km² w jedny z nôbòkadniészich òbéńdów czerpaniô wãgla w kraju. Prezydent Iranu Masud Pezeszkijan zagwësnił, że rząd zrobi wszëtkò, żebë pòmòc szkòdowónym i jich rodzëznóm. Dërchô retënkòwô akcjô i szëkba za robòtnikama, co są zamkłi pòd rozwalënama. Ùdzél w ni bierze irańsczi Czerwòny Półmiesądz.
Nisczé sztandardë bezpiekù w irańsczich kòpalniach ju w ùszłoce prowadzëłë do szlachòwnëch katastrofów, jaczim téż colemało towarzëło lëché przërëchtowanié retënkòwëch służbów. Jeden z nômòcniészich wëbùchów z òstatnëch lat w 2017 rokù zabił 43 lëdzy na nordze kraju, co scygło wiôldżi górz lëdztwa na państwòwé wëszëznë.
Twoje zdanie jest ważne jednak nie może ranić innych osób lub grup.
Komentarze opinie