Zeszłë sã ze sobą trzë leżnoscë, dzãka jaczim Wejrowò sã òżëwiło w pierszim dniu czerwińca.
Òdpùst Pańsczégò Wniebòwstąpieniô w Pasjowim Sanktuarium we Wejrowie jak co rok przëcygnął pielgrzimczi z rozmajitëch partów Kaszëb. Ju òd piątkù trzëdzestégò maja dochôdałë corôz to pòstãpné kómpanie, jaczé pòtikałë sã na mszach i jinszich nôbòżéństwach. Pò przińdzenim slédnëch pielgrzimków w niedzelã pierszégò czerwińca wiérny rëgnãlë w eùcharisticzny procesje na Wejrowską Kalwariã, gdze ò dzesąti gòdzënie bëła òdpùstowô sëma pòd prowadnictwã pòmòcniczégò biskùpa gduńsczi archidiecezje Piotra Przibòrka. Dni òdpùstu zeszłë sã z miesczima òbchòdama Dnia Dzecka w parkù miona Aleksandra Majkòwsczégò a téż w Wòdnëch Ògardach, jaczé téż scygnãłë lëdzy z bùtna gardu, a téż z drëgą turą prezydencczich welacjów. Kòmisje zanotérowałë wiele wikszą frekwencjã jak w pierszim welowanim. Do tegò wënikù niemało przëczënilë sã téż pielgrzimi, jaczi zwëskelë z mòżebnoscë welowaniô bùten môlu zamieszkaniô. H.S.Sz.
Twoje zdanie jest ważne jednak nie może ranić innych osób lub grup.
Komentarze opinie