Kòmitet mieszkańców Wenecje sprocëmniwô sã gòszczeniu zdënkù a wieselégò Jeffa Bezosa i wëłączanim z ti leżnoscë przistãpù do wiele szasëjów na Òstrowie Swiãtégò Jerzégò.
W dniach òd dwadzestégò trzecégò do dwadzestégò ósmégò czerwińca żeni sã ùsôdzca Amazona i trzecy nôbògatszi człowiek na swiece Jeff Bezos ze swòją wëzdrzónką Lauren Sánchez. Na plac ùrządzeniô wieselô wëbrelë Wenecjã, a kònkretno Ostrów Swiãtégò Jerzégò, chtëren wedle italsczich mediów mô bëc prakticzno cawno zajãti przez gòscy. Pòzajimòwóné ju są rezerwacje w hotelach, bùrméster Luigi Brugnaro wëdôł pòlétë pòzamikaniô wiele szasëjów, a zdënk mô kòsztac miliónë dolarów. Mieszkańcë ùsadzëlë protestacjową grëpã „No Space for Bezos” („Ni ma placu dlô Bezosa”), złożoną z nôleżników jinszich òrganizacjów mieszkańców na codzéń zajimającëch sã jiwrã eksploatacje gardu przez turistów, a felënkù starë ò mieszkańców. Procëmnicë gòszczeniô Bezosa w Wenecje zapòwiôdają wskakiwanié do wòdnëch karnôlów i zasztopiwanié wąsczich gasów żebë ùtrudnic gòscóm dońscé na wieselé i zamanifestowac swòje sprocëmnienié. Wedle nich Wenecjô ni mòże stac sã leno biną dlô głosnëch i rozpasznëch rozegracjów, ale mùszi nazôd stac sã môlã do żëcô. Bùrméster Brugnaro gôdôł że wstid mù za taczich mieszkańców, kò wieselé tak wôżny persónë je dlô miasta leżnoscą dëtkòwégò zwëskù.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie