„Kaszubiô to je filozofiô, to są rojitwë Pòlôchów, to aspiracjô, to bùdowanié bezpiekù i gòspòdarczi” – gôdôł na gdińsczi kònferencje Władisłôw Kòsyniôk-Kamisz.
Na kònferencje „Przińdnota Gdinie i Pòmòrzégò” w pòniedzôłk piątégò maja wicepremiéra i szef Ministerstwa Nôrodny Òbarnë Władisłôw Kòsyniôk-Kamisz zapòwiedzôł pòwstanié Zelonégò Industrialnégò Òkrãgù Kaszubiô. Mô to bëc rozpisóny na dekadë i nigdë niekùńczący sã projekt ùprawieniô gòspòdarczi i òbarnëch spòsobnosców Pòlsczi. Wchadac w to mô jakno pierszô bùdacjô Czerwiony Drodżi przez pòstãpné trzë lata, parłãczący Gdiniã z krajewima i ekspresowima drogama a téż wszelejaczi infrastrukturë, w tim ti do òbsłëdżi wòjsków, pòtemù rozwij banowégò jadra, a w kùńcu inwesticje môłëch i strzédnëch firmów. Te, wedle Maceja Samsonowicza, dorôdcë ministra nôrodny òbarnë, miałë bë bëc zgrëpkòwóné w dolëznach zajimającëch sã rozwijã technologie dronów brëkòwnëch do barnieniô energeticzny infrastrukturë na mòrzu, w innowacjowi dolëznie òd przerôbianiô, analizë i òchronë pòdôwków a rozwijaniô sztëczny inteligencje, a téż w wòdzëkòwi dolëznie, zagwësniwający jesz skùtkòwniészé wëzwëskanié sztrómù, jaczi mdą robic sztrómòwé wietrzniczi na mòrzu czë atomòwô elektrowniô w Chòczewie. Wedle bùrméstra Rëmie Michała Pasecznégò na projekce mòckò zwëskô Môłi Kaszëbsczi Trzëgard, bò Kaszubiô mòckò rozkòscérzi inwesticjowé spòsobnoscë w Rëmie, Rédze i Wejrowie. Dali wzmòcnionô bãdze pòzycjô wiesczich terenów, z jaczich mieszkańcë mdą mielë kródzy do robòtë, a na tim mô w dalszim pòzdrzatkù zwëskac całé Pòmòrzé. H.S.Sz.
Twoje zdanie jest ważne jednak nie może ranić innych osób lub grup.
Ten komentarz jest ukryty - kliknij żeby przeczytać.
Je to kòmùdné, ale czãsto prôwdzëwé. Z drëdżi stronë wiele razy lëdze z bùtna robią wicy dlô kaszëbsczi swiądë jak sami Kaszëbi.