Ùroczëzna sparłãczonô bëła z òbchòdama stalatégò gduńsczi archidiecezje. Swiãtą mszã prowadzył nastãpnik swiãtégô Wòjcecha Jón Graùbner.
W niedzelã jednôstégò maja gduńskô archidiecezjô fejrowała stalaté swòjégò jistnieniô, a téż òdpùst na tczã swiãtégò Wòjcecha – patrona archidiecezje i całi Pòlsczi. Ò dzewiąti reno spòd Mariacczi Bazyliczi we Gduńskù rëgnãła procesjô z relikwiama swiãtégò Wòjcecha, chtërna na Stôrëch Szkòtach sparłãczëła sã z pòchadą archidiecezjalny młodzëznë, żebë w kùńcu stanąc na Grzëpie Swiãtégò Wòjcecha. Tam w pôłnié zaczãła sã swiãtô mszô, jaką prowadzył prasczi arcybiskùp Jón Graùbner, primas Czech i nastãpnik swiãtégò Wòjcecha, a kòncelebrowôł gduńsczi arcybiskùp Tadeùsz Wòjda. Pò mszë wiérny mòglë òbezdrzec historiczną rekònstrukcjã żëwòta swiãtégò Wòjcecha pòd titlã „Historiô Apòsztoła Nordë” w wëkònanim Bracyństwa Templariuszów. Pò môltëchù zrëchtowónym przez môlowi Caritas na kùńc zagróny béł téż kòncert „Prowadzë naji bôt”, na jaczim wëstąpiła midzë jinszima Weronika Kòrthals.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie