Reklama

Wiôldżi òdżin w òstrzódkù jądrowëch badérowaniów

Klëka

06/02/2026 20:34

Òdj. Alexander Blecher, blecher.info; zdrzódło: https://de.wikipedia.org/wiki/GSI_Helmholtzzentrum_f%C3%BCr_Schwerionenforschung#/media/Datei:GSI,_Darmstadt,_Juli_2015_(20).JPG

Taksowanié materialnëch stratów jesz bawi, ale je wiedzec, że bãdą òne stolëmné. Òpózdniony òstôł projekt za przez trzë miliardë eùro.

We czwiôrtk piątégò gromicznika reno wëbùchł òdżin na terenie Centrum Helmholtza do Badérowaniów Cãżczich Jonów w Darmstadce w Hesje. Ògniowô starżô dostała wiadã pół sódmi reno. Robòtnicë i badérowie sã ewakùòwelë i nicht w zdarzenim nie béł reniony. Biôtka z płomieniama równak dérowała całi dzéń, a brało w ni ùdzél kòl sto trzëdzescë ògniarzów. Zażôlił sã system dotëgòwiwaniô mòcë do bùdowónégò na terenie òstrzódka akceleratora cząstków. Taczé ùrządzenia pòrëchliwają rësznotã elementarnëch cząstków atomów, co pòzwôlô na jich zaawansowané badérowania. W projekt bùdacje akceleratora ò dłużawie tësąc sto métrów pòd nazwą Òstrzódk Badérowaniô Antiprotonów i Jonów bëło zaangażowóné czile krajów, a jegò kòszt béł òbtaksowóny na kòl trzë miliardë trzësta miliónów eùro. Je wiedzec, że sama jegò bùdacjô nie bëła narëszonô, le przez ùszkòdzenia w ju dzejającëch systemach robòtë nad akceleratorã fest sã òpózdnią. Pòcwierdzył to hesczi minister nôùczi Timmón Gremmels. Badérowie chcelë testowo ùrësznic instalacjã pierszi rôz jesz latos w gòdnikù. Pòtemù pierszé eksperimentë rëgnãłëbë pòd kùńc pòstãpnégò rokù, a regùlarné badérowania bë szło zaczic w dwa tësące dwadzestim ósmim. Lokalné wëszëznë pòdałë, że nie doszło do ùwòlnieniô do strzodowiszcza niebezpiecznëch substancjów.

H.S.Sz.

Źródło i opracowanie własne