Reklama

Wòjewódzczé òżniwinë w Pszczółkach

Klëka

16/09/2025 10:09

Òdj. Jacek Sowa; zdrzódło: www.pomorskie.eu

Na Swiãce Plonów robòtã gbùrów ùczestniło całé wòjewdztwò, a towarził mù kòngres z przedstôwcama wòjewódzczich i państwòwëch wëszëznów.

W weekend trzënôstégò i sztërnôstégò séwnika w Pszczółkach bëło Pòmòrsczé Swiãto Plonów – wòjewódzczé òżniwinë, jaczé fejrowóné bëłë w Lëpòwim Parkù. Bëłë krómë z jôdą i rzemiãsłã, a na binie mùzyczné wëstãpë regionalnëch karnów jak téż gòsców z bùtna Pòmòrzô. W pierszi dzéń wëdarzeniémù towarził Kòngres Pòmòrsczi Wsë zrëchtowóny w Hotelu Bartnik, z ùdzélã midzë jinszima ministra gbùrzëznë Sztefana Krajewsczégò i wicemarszałka pòmòrsczégò wòjewództwa Adama Gawrilika – titel prelekcjów i debatë to „Przińdnota pòmòrsczi gbùrzëznë w warënkach zelony transfòrmacje i zbrojnëch kònfliktów na swiece”. W drëdżi dzéń òżniwinów bëła mszô za rolników, a téż prezentacje krézów na binie – pierszi plac zajął stargardzczi kréz, drëdżi sztumsczi, a trzecy gduńsczi. W kònkùrsu na òżniwinowé wińce dobëło sztôłtëstwò Biernatka w gminie Czôrné, a dali na pòdium bëło szôłtëstwò Szczerbiãcëno w gminie Dërszewò i Kòło Wiesczich Gòspòdiniów w Celbòwie w gminie Pùck. W przińdłim rokù Pòmòrsczé Swiãto Plonów bãdze w Sztumie.

H.S.Sz.