Wòjna na Ùkrajinie przëbôczëła ò zabëti chòroscë

Gazowô gangrena slédny raz mòcni sã szérzwiła pò Eùropie òb czas pierszi swiatowi wòjnë. Do ji pòwrotu przëczëniłë sã dronë.

Lékarze z biôtkòwiszczów Ùkrajinë przekazéwają, że ù lékarzonëch żôłnérzi mòże czãsto pòtkac gazową gangrenã. Ta chòrosc je terô baro rzôdkô – ji wëstãpòwanié w wòjnowëch warënkach zmniészëło sã òd piãc procent w czasach wòjnë w Wietnamie do jedny dzesąti procenta dzysdnia. Czãstim zjawiszczã bëła jesz òb czas pierszi swiatowi wòjnë. Gazowô gangrena rozwijô sã pò wëstąpienim głãbòczich renów przez bezkrziseniowé bakterie ôrtu Clostridium. Czej do tëch nie dochôdô krziseń, zaczinają wëdzelëwac toksynë halóné przez gaz, chtëren zbiérô sã pòd skórą i chùtkò rozkòscérzô pò całim òrganizmie. W placach zrenieniô pòjôwiô sã òstri ból, skóra pùchnie i czerwienieje, a pòtemù robi sã sënô. Pòd pôlcama je czëc trzeszczenié òd gazu. Dali chòrosc zajimô corôz wicy placu, wkòl renów zbiérô sã stur. Czãsto rozwij je baro chùtczi i je widzec zjinaczi gòłim òkã ju pò czile gòdzënach. Nielékarzonô gazowô gangrena wnetka wiedno prowadzy do smiercë. Żebë jã lékarzëc, nót je chirurgiczno òczëscëc renã przez rëmniãcé zakôżony tkanczi ë pòdawac dożilno fest drãdżé antibioticzi. Na Ùkrajinie pòwszedné stało sã brëkòwanié dronów, chtërne ùcãżiwają abò ùnimòżebniwają ewakùacjã renionëch z biôtkòwiszczów. To zjiscywô perfektné warënczi do wëstąpieniô i rozwiju gazowi gangrenë. Chòri są czãsto zabiéróny nôwëżi do pòdzemnëch bùnkrów. Tam przez lëchi przistãp do sprzãtu medicë mùszą próbòwac pòmòc żôłnérzóm przez pòdôwanié antibiotików ò jak nôszerszim dzejanim, co je mni efektiwné a téż zwiksziwô rizykò antibiotikòòdpiérnoscë w przińdnoce. Na rozwij ë wësoką smiertnotã gazowi gangrenë mô cësk téż to, że òd zakôżeniô do pòtkaniô z lékarzã żôłnérze colemało mùszą żdac pò czile tidzeniów, czej je ju za pózdno na skùtkòwną pòmòc.

H.S.Sz.