Reklama
Wòjna zmieniła ùkrajińsczé psë
24/01/2026 11:10
Lëdze, jaczi ùcékelë z terenów dzys òbjimniãtëch wòjną, czãsto òstôwielë tam swòje tósze. Badérowie sprôwdzëlë, jak so òne radzą.
Pòlsczi a ùkrajińsczi ùczałi prowadzëlë badérowania pòpùlacje psów biégającëch lózã na Ùkrajinie. Dérowało to òd strëmiannika dwa tësące dwadzestégò trzecégò do stëcznika dwa tësące dwadzestégò czwiôrtégò rokù. Apartné bôczenié delë na przëmierzenié ze sobą tëch na terenach krótkò frontu z tima w bezpieczniészich partach kraju. Rozjinaczëna bëła wiôlgô, bò krótkò frontu wnetka do czësta zanikłë znanczi zdobnëch rasów. Nie bëło psów z krótczima pëskama i nogama, bò të przez lëchi dich i drãdżi teren nie przedërchałë. Nie szło téż pòtkac wiôldżich tószów, bò te rozsadzëłë minë, a ne môłé ë strzédné są za letczé, żebë aktiwòwac jich mechanizmë. Frontowé psë miałë w wikszoscë prostą serzchel strzédny dłużawë. Nabrałë znanków dzëczich psów, w czerënkù tëch znónëch z jinëch partów swiata. Nie bëło westrzód nich stôrëch abò chòrëch òsobników, leno wiele wëgłodzonëch. Ùczałi gôdają, że w warënkach wòjnë, zagrôżbë i felënkù lëdzczégò dozéru przeżiwają leno tósze dopasowóné do drãdżich warënków, a to dało cësk na jich pòpùlacjã w pòstãpnëch pòkòleniach. Badérowania ùdało sã przeprowadzec na tëch psach, co pòdchôdałë do lëdzy, ale dzãka dronóm ùdało sã pòcwierdzëc, że są téż samòstójné piesactwa, co same wëcmanim jachtëją abò szukają za zdechłim zwierzã. Na całi Ùkrajinie w jôdze psów wikszi ùdzél mają roscënowé produktë. Nawet w bezpiecznëch partach kraju lëdze ju rzôdkò dokôrmiają psë miãsã, miast tegò dają jima bùlwë, krëpë abò chléb. W badérowaniach pòmôgelë żôłnérze i cywile, w tim lëdze co robią we wcyg dzejającëch schroniszczach.
H.S.Sz.
Załączniki
Źródło i opracowanie własne
Aktualizacja: 24/01/2026 15:21
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Komentarze
-
Reklama
-
2026-01-26 22:23:06cekawé badérowanié, darwinowa teòriô w praktice, szkòda leno, że pòcwiérdzô sã w taczich leżnoscach
odpowiedz -
2026-01-29 13:58:59
Mie zaczekawiło, że wikszé psë téż zdżinãłë. Jem zabéł ò tëch minach.
Reklama
Wideo
Reklama
cekawé badérowanié, darwinowa teòriô w praktice, szkòda leno, że pòcwiérdzô sã w taczich leżnoscach
Mie zaczekawiło, że wikszé psë téż zdżinãłë. Jem zabéł ò tëch minach.