Reklama

Wòjskò na szasëjach Słëpska

Klëka

11/01/2026 13:29

Òdj. z facebookòwi starnë: Wojska Obrony Terytorialnej

Z zôczątkù wódcë òdmówilë wspiarcô prezydentce Kristinie Danielecczi-Wòjewódzczi. Zarô równak jak dostelë zgòdã òd pòdwëższich, wrëgnãlë do gardu.

Półkòwnik Sztefón Swidursczi, kòmendant Centralnégò Pòligònu Lëftowëch Sył w Ùstce, dôł do wiadë ò dostónym òd pòdwëższich zadanim wësłaniô żôłnérzi do Słëpska. Nowò sfòrmowónô zadaniowô grëpa „Słëpsk” bãdze przebëwac w gardze do òdwòłaniô. Twòrzą jã żôłnérze i wòzë służącé na co dzéń na ùstecczim pòligònie a téż w Procëmlatawnym Półkù w Kòszalënie. Wrëgnãlë do miasta w piątk dzewiątégò stëcznika reno, a pòstãpnégò dnia doparłãczëłë do nich Wòjska Teritorialny Òbarnë. Dzejania wòjska we Słëpskù są prowadzoné w dogôdanim z administracjowima wëszëznama, na co równak bëło nót apartny zgòdë. Czej ò wspiarcé w związkù z drãgą stojizną w gardze we czwiôrtk prosëła prezydentka gardu Kristina Danieleckô-Wòjewódzkô, wódcë z Ùstczi òdmówilë i rzeklë, że nót żdac na domkniãcé procedurów. Z ùżëcym wòjskòwëch wòzów ë sprzãtów żôłnérze bãdą pòmagac w òdsnieżanim Słëpska. Dotądka zajimało sã tim sto piãcdzësąt robòtników miesczi Pòdjimiznë Kòmùnalny Gòspòdarczi ë priwatné firmë. We wiele dzélach gardu zalégô nawet pò sétmëdzesąt centimetrów sniegù, tej dzejania mùszą bëc chùtczé, bò prognozë prorokùją pòstãpné òpadë. Żôłnérze nôczãscy są òdséłóny tam, gdze jinszi mają drãgò dojachac, w tim na dojazdowé drodżi do òbsedlów. Tam żôłnérze drawò spichają sniég z dróg maszinama wiele wikszima jak miesczé płëdżi.

H.S.Sz.

Źródło i opracowanie własne