Wrôcô téma pòmnika Stalëna w Mińskù

Ò wrócenim sztaturë sowiecczégò diktatora w pùbliczny rum biôłorusczi stolëcë w slédnëch latach bëła gôdka ju czile razy. Terô jednoznaczno za ùdbą wëpòwiedzelë sã biôłorusczi kòmùniscë.

W sobòtã szóstégò gòdnika na zjezdze Centralnégò Kòmitetu Kòmùnisticzny Partie Biôłorusczi w Mińskù sekretéra do sprôw Dejowi Robòtë Pioter Pietrowsczi dôł do wiadë, że planowóné je nazôdné pòstawienié pamiãtnika Józefòwi Stalënowi w biôłorusczi stolëcë. Wniósczi w ti sprawie skłôdelë tak nôleżnicë partie jak i zwëczajny òbëwatele. Przë leżnoscë tegò ògłosu Pietrowsczi òbgôdôł téż kwestiã pòdwôżaniô kùltu Stalëna przez niechtërnëch kòmùnistów. Wiele sztaturów diktatora bëło rozbiérónëch doch jesz za czasów Sowiecczégò Związkù pò wëstąpienim Nikitë Chruszczowa na Dwadzestim Zjezdze Kòmùnisticzny Partie Sowiecczégò Związkù w tësąc dzewiãcset piãcdzesątim szóstim rokù. Tamtoczasny pierszi sekretéra dôł tedë referat pòd titlã „Ò kùlce jednostczi i jegò pòsobiznach”. Tam òstro skritikòwôł praktikòwóny tedë kùlt Stalëna. Pietrowsczi przëbôcził, że pòtemù chińsczi kòmùniscë kriticzno zdrzelë na rewizjonizm Chruszczowa i widzelë w nim felã, jakô doprowadzëła do krizysu w sowiecczi spòlëznie. Dali dôł przëmiar, że i wedle nônowszégò pòzdrzatkù rapòrt Chruszczowa nie béł dosc rzetelny – ò tim bëło gôdóné na zjezdze Kòmùnisticzny Partie Rusczi Federacje latos w lëpińcu. Na tim spòdlim pòstawienié pamiãtnika Stalënowi w Mińskù miałobë bëc aktã historiczny sprawiedlëwòscë i òdemkłi a prôwdzëwi prôcë nad ùprawienim felów. Przëbôcził téż, że wedle wiadów, jaczé mô Kòmùnisticznô Partiô Biôłorusczi, gdzes w kraju mają bëc jesz taconé wikszé fragmentë dzewiãcmétrowégò pamiãtnika Stalëna, jaczi stojôł na Centralnym Placu òd tësąc dzewiãcset piãcdzesątégò drëdżégò do tësąc dzewiãcset szescdzesątégò pierszégò rokù. Mëslą ò wëzwëskanim tëch fragmentów na nowò, jeżlëbë sã do tegò jesz nadôwałë.

H.S.Sz.