Reklama

Wëroczi w sprawie Mòstu Mòrandiégò

Klëka

16/07/2026 19:56

Òdj. Bbruno; zdrzódło: https://pl.wikipedia.org/wiki/Ponte_Morandi#/media/Plik:Genova_ponte_Morandi.jpg

Òsmë lat pò katastrofie w Genuji wëcmanizna òbsłëgiwającô wiadukt wëdała przeprosënë, a sąd wëdôwô wëroczi w sprawie.

Sztërnôstégò zélnika dwa tësące òsmënôstégò rokù w Genuji w nordowi Italsce zawalił sã Mòst Mòrandiégò nad rzéką Polcevera. Òb czas òstri bùrzë zerwało sã dwasta métrów mòstu i pëlón wësoczi na dzewiãcdzesąt métrów. Zdżinãłë tedë sztërdzescë trzë òsobë. Przez trzë lata prokùratura przedstawiła aktë òbwinë piãcdzesąt dzewiãc òsobóm, w tim wësoczim ùrzãdnikóm i przedstôwcóm a partnéróm wëcmaniznë Aspi, znóny téż pòd pòzwą Autostrade per l'Italia – Aùtobanë dlô Italsczi. Przédnik wëcmaniznë z czasu katastrofë Giovanni Castelucci na wniósk prokùraturë miôł dostac òsmënôsce lat i szesc miesący sôdzë za òbszczãdzywanié na kònserwacje kònstrukcje. Przédnik przëznôł, że bierze na sebie part òdpòwiedzalnotë, ale nié winã za zdarzenié, bò sóm dozerac inspekcjów doch nie béł w sztãdze. Na czwiôrtk szestnôstégò lëpińca sąd w Genuji zaplanowôł ògłoszenié wëroków w sprawie. Sóm Castelucci ju sedzy w sôdzë òd łońsczégò rokù, bò tedë skôzelë gò na sztërë lata w sprawie rozbicô aùtobùsu ò wiadukt Aspi w dwa tësące trzënôstim, a zdżinãło tedë sztërdzescë òsób. Òstatno wëcmanizna Aspi, jaczi nowim przédnikã òd rokù je Gian Maria Gros-Pietro, wëdała òficjalné przeprosënë dlô rodzëznów òfiarów. Prowadniczka Kòmitetu Pamiãcë Òfiarów Mòstu Mòrandi Egle Possetti gôdô, że przeprosënë na czile dni przed wërokã to wiele za pózdno, bò rodzëznë miałëbë je ùczëc ju te òsmë lat nazôd.

H.S.Sz.

Źródło i opracowanie własne