Reklama

Wërok dlô pòdwëższégò gduńsczich pòdwòdników

Klëka

16/11/2025 18:44

Pògrzéb Bartosza Błiskala. https://www.gov.pl/web/kmpsp-gdansk/pozegnanie-sp-st-sekc-bartosza-blyskala

Czej dwa lata nazôd pò lasach Trzëgardzczégò Krôjmalënkòwégò Parkù szukelë żôłnérza-mòrdarza Grégòra Bòrisa, w jednym z błotków zdżinął ògniôrz. Wërok w ti sprawie ùczuł czerownik jegò jednostczi.

W piątk sztërnôstégò smùtana gazétny rzecznik Òkrãgòwégò Sądu we Gduńskù Mariusz Kazmiérczôk dôł do wiadë, że w séwnikù Rejonowi Sąd we Gdinie wëdôł wërok w sprawie smiercë ògniarsczégò pòdwòdnika. Dwadzesce sétmë lat stôri Bartosz Błiskôl stracył przëtomnosc pierszégò smùtana dwa lata nazôd òb czas akcje w jednym z błotków Trzëgardzczégò Krôjmalënkòwégò Parkù – dérowała tedë szëkba za mòrdarzã Grégòrã Bòrisã, jaczégò pòtemù nalezlë miartwim w zbiérnikù Lëpùsz w Gdinie. Ògniôrz ùmarł w bòlëcë. Gdińsczi sąd ùznôł, że winnym jegò smiercë béł czerownik karna pòdwòdników Miesczi Kòmendë Państwòwi Ògniowi Starżë we Gduńskù. Òbwinowôł gò ò przekroczenié ùprôwnieniów i niedopilowanié òbrzészków òb czas akcje, przez co Bartosz Błiskôl stracył żëcé. Jegò pòdwëższi dostôł sztrôfã rokù sôdzë w zawieszenim na trzë lata, sto piãcdzesąt tësący złotëch òdpłatë dlô rodzëznë ùmarłégò, dzesãc tësący złotëch sztrôfë, piãc lat zôkazu zajimaniô stanowiszczów zrzeszonëch z bezpiekã i trzë lata zôkazu robòtë jakno instruktór pòdwòdników.

H.S.Sz.