Tribùnał zgòdzył sã z òpinią Kòmisje, że terné prawò w dwùch krajach ògrańcziwô cëzyńcóm ùdzél w samòrządowëch i eùropejsczich welacjach.
We wtórk 19. smùtana Tribùnał Sprawiedlëwòscë Eùropejsczi Ùnie w òdpòwiescë na òbskargã Eùropejsczi Kòmisje scwierdzył, że krajowé prawò Czesczi i Pòlsczi stoją w przék prawù Eùropejsczi Ùnie ò biérnym welacjowim prawie w welacjach samòrządowëch i eùropejsczich dlô lëdzy z jednégò z krajów Ùnie, chtërny mieszkają w jinszim nôleżnym do ni kraju, ale nie są jegò òbëwatelama. Wedle ùniowëch regùlacjów ni miało bë bëc rozjinaczënë z pòzdrzatkù na państwòwą przënôleżnosc. Timczasã chòc w Czesczi i Pòlsczi òbëwatele państwów Ùnie mògą brac ùdzél w welacjach jakno kandidacë, to ni mògą wchadac do pòliticznëch partiów, co mòcno ògrańcziwô jich mòżlëwòscë i szanse w welacjach.
Wedle wërokù TSEÙ, terô Czeskô i Pòlskô miałë bë zmienic swòje prawò, tak żebë cëzyńcowie mòglë òstawac nôleżnikama dzejającëch w kraju pòliticznëch partiów. Sąd w Luksembùrgù nie zgòdzył sã ze scwierdzenim, że takô zmiana mòże narëszëc „nôrodną juwernotã” w tëch krajach, bò Ùniô nie nakłôdò na swòjich nôleżników òbrzészkù daniô cëzyńcóm mòżlëwòscë kandidowaniô w krajowëch welacjach do parlamentu czë prezydencczich – wedle wërokù taką mòżlëwòsc mają miec leno, żelë chòdzy ò wëbiéranié bëtników do òrganów samòrządów abò Eùropejsczi Ùnie.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie