Reklama

Wërok za mòrdarstwò szkòlôczczi

Klëka

21/10/2025 09:27

Zdrzódło: https://en.wikipedia.org/wiki/Seoul#/map/0

Òsmë lat stôré dzéwczã zdżinãło pò żgniãcym nożã przez swòjã szkólną. W dzéń atakù szandarzë przëpetiwelë jã w sprawie ji rëchlészich agresywnëch zachòwaniów.

W pòniedzôłk dwadzestégò rujana sąd w Seùlu wëdôł wërok w sprawie sztërdzescë òsmë lat stôri szkólny Miong Dze-wan, jakô latos w gromicznikù zabiła swòjã ùczenkã. Przed zdarzenim miała jic na szescmiesãczny ùrlop przez depresjã, ale wrócëła do robòtë pò dzesãc dniach, czej lékôrz scwierdzył, że je zdrów i mòże dali ùczëc. Czile dni przed atakã miała pòkazowac téż jinëch agresywnëch zachòwaniów, midzë jinszima skazëła szkòłowi kómpùter a téż chwôcëła jinégò szkólnégò za szëjã. W dzéń, w jaczi do szkòłë przëjachała pòlicjô, żebë wëwidnic incydent, pò òdjachanim szandarów dokònała mòrdarstwa. Przërôczëła do jedny z klasów òsmëlatną szkòlôczkã, a tam żgnãła jã nożã, kaléczącë téż sebie. Czej szoféra szkòłowégò aùtobùsu òdwòżący dzecë pò zajmach zmerkôł, że felëje jednégò z dzéwczãt, dôł ò tim do wiadë władzóm szkòłë. Pò nalézenim renionégò dzéwùsa ze szkólną òbie òstałë przewiozłé do bòlëcë, gdze òsmëlatka ùmarła. Miong Dze-wan tłómaczëła sã, że przez depresjã ni miała fùlnégò pòzdrzatkù na sytuacjã, a téż séłała do sądu wiele lëstów z wërażenim żôlu za swòjã zbrodniã. Gòdała, że miała ùdbóné zabic jedno przëpôdkòwò wëbróné dzeckò, a pòtemù sebie. Prokùratura i rodzëzna zabitégò dzecka bëłë za tim, żebë dac mòrdarce sztrôfã smiercë. Sąd równak skôzôł jã na dosmiertną sztrôfã i noszenié przez trzëdzescë lat elektronicznégò lokalizacjowégò ùrządzeniô. Wëszëznë Pôłniowi Kòreji wezwałë do zwikszeniô sztandardów bezpiekù w szkòłach a téż òsoblëwé bôczenié na psychiczną stojiznã szkólnëch.

H.S.Sz.